Oqý-aǵartý ministri Ashat Aimaǵambetov jańa oqý jyly qarsańynda balasynyń mektep formasyna qansha aqsha jumsaǵanyn aitty, - dep habarlaidy "Ult aqparat".
Úkimet kýlýarynda jýrnalister suraǵyna jaýap bergen ol mektepke baratyn bir balasy bar ekenin aitty.
“Osy demalysta ulymdy ertip, dúkenge bardym. Birneshe aq jeide, kostiým, shalbar, galstýk aldyq. Jalpy alǵanda 35 myń teńge ketti. Kiimderdi “Glassman” saýda úiinen taptyq. Elmen birge kezekte turyp, barlyq otbasy sekildi mektepke daiyndalyp jatyrmyz”, – dedi Aimaǵambetov.
Sonymen qatar, ministr áleýmettik jaǵdaiy tómen otbasylarǵa qatysty sheshim qabyldaǵanyn da aitty.
“Biyl ata-analar jyldar boiy kótergen máseleniń sheshimin taptyq. Buryn oqýshylarǵa jeńi salbyrap turatyn, ózine shaq kelmeitin formalar beriletin. Endi formaǵa ketetin qarajatty ata-ananyń jeke shotyna aýdaramyz. Biyl qarajattyń eń tómengi deńgeii 37 myń bolyp bekitildi. Bul 475 myń balanyń máselesin sheshýge kómektesedi”, – dedi ol.
