Mádeniet jáne sport ministri Aqtoty Raiymqulova əielder arasynda shahmattan Aziia chempiony atanǵan Bibisara Asaýbaevany quttyqtady, dep habarlaidy "Ult aqparat".
"Siz es bilip, shahmat taqtasyna qol sozǵan tórt jastan bastap ushqyr oi men kóz ilespes jyldamdyqty biriktirgen sport túriniń sheberi ekenińizdi pash etip kelesiz. Ár jetistigińiz arqyly baitaq otanymyzdyń jas órenderin adamzat tarihyndaǵy eń ejelgi oiynnyń birimen jaqyn tanystyryp, keńinen nasihattap jatyrsyz. Aldaǵy ýaqytta da 64 sharshy arasyndaǵy aqyl-oi arpalysynda mereiińiz ústem túse bersin", - dep jazdy Raiymqulova.
Sondai-aq ministr talai synda shyn maitalman retinde Qazaqstannyń atyn shyǵarýǵa tilek bildirdi.
Bibisara Asaýbaeva əielder arasynda Aziia chempiony atandy. Bul týraly shahmatshy áleýmettik jelidegi paraqshasynda habarlady.
"Qurmetti dostar! Búgin men áielder arasynda Aziia chempiony ataǵyn jeńip aldym! Bul meniń áielder arasyndaǵy alǵashqy mańyzdy ataǵym", - dep jazdy ol.
Asaýbaeva 2004 jyly Taraz qalasynda dúniege kelgen. Shahmatpen tórt jasynan beri ainalysyp kele jatqan ol jeti jasynda FIDE sheberi ataǵyn alǵan. 2017 jyly 14 jasqa deiingi álem chempiony atandy.
Ol 2016 jyly azamattyǵyn ózgertip, Máskeý oblysy shahmat federatsiiasynyń múshesi boldy. Alaida 2017 jyldyń qarashasynda reseilik jattyqtyrýshy Evgenii Solojenkin 13 jastaǵy Bibasarany elektrondy kómek quraldaryn qoldandy dep aiyptady.
Sot Bibisara Asaýbaevanyń elektrondy kómek quraldaryn paidalanǵanyn joqqa shyǵaryp, jala jabyldy degen úkim shyǵardy.
2019 jyldyń aqpanynda shahmatshynyń Qazaqstanǵa oralýdy uiǵarǵany habarlandy.
