Indýstriia jáne infraqurylymdyq damý ministri Qaiyrbek Óskenbaev aýyldardy aýyzsýmen qamtý boiynsha artta qalyp otyrǵan óńirlerdi atady, dep habarlaidy Ulysmedia.kz.
«Memleket basshysy byltyrǵy Joldaýynda 2025 jyly halyqty sapaly aýyz sýmen qamtýdy 100 paiyzǵa jetkizýdi tapsyrdy. Osy maqsatta, «Qýatty óńirler – el damýynyń draiveri» Ulttyq jobasy aiasynda 2025 jyly atalǵan kórsetkishti tolyq oryndaý josparlanǵan. 2021 jyldyń qorytyndysyna sáikes, sýmen jabdyqtaý qyzmetterimen qamtý respýblika boiynsha 96 paiyzdy, onyń ishinde aýyldarda 93 paiyzdy qurady», - dedi Óskenbaev.
Ministrdiń sózinshe, jekelegen óńirler bul baǵyttaǵy jumystar boiynsha artta qalyp otyr. Aýyldardy aýyzsýmen qamtýdyń eń tómengi deńgeii Qostanai (74,9%) men Soltústik Qazaqstan oblystarynda (83,5%) tirkeldi.
«2021-2025 jyldarǵa arnalǵan Ulttyq joba aiasynda sýmen jabdyqtaý qyzmetterimen 100 paiyz qamtý úshin respýblikalyq biýdjetten 498 mlrd teńge, onyń ishinde aýyldarǵa 261 mlrd teńge qaralǵan. Biyl aýyldardy aýyz sýmen qamtamasyz etý deńgeiin 94,7 paiyzǵa jetkizýdi josparlap otyrmyz», - dedi vedomstvo basshysy.
Onyń aitýynsha, elimizde 6 302 aýyldy eldi meken bolsa, onyń 4 759-y sýmen qamtylǵan. Qalǵan 1 543 aýyldy kezeń-kezeńimen qamtamasyz etý jospary ázirlendi, onda respýblikanyń árbir eldi mekeni esepke alyndy.
«Qamtamasyz etilmegen aýyldardyń 511-inde ortalyqtandyrylǵan sýmen jabdyqtaý qurylysy josparlanyp otyr. Al halqy az 1 032 aýylda (200 adamnan tómen) jergilikti biýdjet qarajaty esebinen keshendi blok-modýlder (KBM) ornatylady. Onyń ishinde biyl taǵy 120 aýyldy ortalyqtandyrylǵan sýmen qamtamasyz etý jáne halqy az 220 aýylǵa KBM ornatý josparlanǵan», - dedi Óskenbaev.
