Foto: © Sputnik / Bolat Shaihinov
Bas prokýrordyń orynbasary Áset Shyndaliev asa iri kólemde qarajat jymqyrdy degen aiyppen 6 jylǵa sottalǵan Qairat Satybaldynyń ózine taǵaiyndalǵan jazany jeńildetý týraly ótinish berýine bailanysty pikir bildirdi, dep habarlaidy Kazinform.
Buǵan deiin «Qazaqtelekom» jáne «Kóliktik servis ortalyǵy» kompaniialarynyń qarajatyn jymqyrdy degen kúdikpen ustalyp, 6 jylǵa sottalǵan Qairat Satybaldy Qylmystyq-atqarý júiesiniń Shyǵys Qazaqstandaǵy departamentine merziminen buryn shartty túrde bosatý týraly ótinish joldaǵany týraly málimet taraǵan edi.
Astanadaǵy adam quqyqtaryn qorǵaý zańnamasyn jetildirýge arnalǵan halyqaralyq konferentsiia barysynda jýrnalister Bas prokýrordyń orynbasarynan osy málimet týraly pikirin surady.
«Kez kelgen sottalǵan azamattyń merziminen buryn bosatý nemese jaza túrin aýystyrý týraly ótinish túsirýge quqyǵy bar. Biraq biraz qylmys boiynsha ondai quqyqty qoldanýǵa tyiym salynady. Atap aitsaq, terroristik, ekstremistik, jemqorlyq baptary boiynsha sottalǵandar jazadan bosatylmaidy. Bul atalǵandardyń bárine emes, biraq shekteýler bar. Qairat Satybaldyǵa kelsek, ondai aryz berýge quqyǵy bar. Ol aryz sotta qaralady. Sot sheshimi qandai bolatynyn qazir eshkim aita almaidy. Ol aryz bergen soń birden bosatady dep te eshkim aita almaidy. Protsess bir aidyń ishinde qaralýy múmkin. Bul jerde sot otyrysy qashan bolatynyna bailanysty. Al otyrystyń qashan ótetinin sot organdarynan bilgenderińiz durys», — dedi Eldos Shyndaliev.
Jýrnalist Bas prokýrordyń orynbasarynan sot Qairat Satybaldyny aiypty dep tanyǵan baptar onyń merziminen buryn bosaýyna qanshalyqty kedergi bolatynyn naqtylady.
«Jalpy ol baptar ondai múmkindik beredi. Biraq jańa da aitqanymdai, bul tek onyń quqyǵy. Ol quqyǵyn qanshalyqty qanaǵattandyratynyn sot qaraidy. Sot qaraǵanda da jazany óteý kezindegi minezdemesi qandai bolǵanyn, sottalardyń aldyndaǵy minezdemesi qandai bolǵanyn, sonyń bárin tikelei, keshendi túrde qaraidy. Sodan keiin baryp sheshim qabyldaidy. Bul jerde erekshe aitý kerek, atalǵan azamat túsirgen ótinishtiń máni merziminen buryn bosatý emes, sot belgilegen jazany ózgertý týraly bolyp otyr», — dedi Bas prokýrordyń orynbasary.
