Portýgaliianyń Público basylymy Reseidiń 55 jastaǵy milliarderi, "Chelsi" fýtbol klýbynyń iesi Roman Abramovich sefard evreileriniń urpaǵy retinde Portýgaliia azamattyǵyn alǵanyn anyqtady.
Maqala avtorynyń jazýynsha, azamattyq alý protsesi 2020 jyldyń sáýirinde bastalyp, 2021 jyldyń sáýirinde aiaqtalǵan. Jýrnalist Abramovichtiń azamattyq alǵanyn dáleldeitin qujatty óz kózimen kórgenin aitady.
Biznesmen ainalasyndaǵy adamdardyń biri RBK basylymyna "Portýgaliianyń "Qaita oralý týraly" zańynyń arqasynda biyl jyl basynda Abramovich Portýgaliia azamaty boldy. Bul zań sefard evreileriniń (Ispaniia men Portýgaliiadan shyqqandar) men konverso evreileriniń (kúshpen shoqyndyrylǵandar) Portýgaliia azamattyǵyn alýyna múmkindik beredi", - dep jaýap bergen.
- 14 milliard dollary bar Abramovich osylaisha Portýgaliiadaǵy eń bai adam bolyp shyǵa keldi,- dep jazady Público basylymy.
Abramovich buryn Ulybritaniiada turǵan, biraq Britaniia vizasyn sozdyrý qiyndaǵan soń 2018 jyly Tel-Avivke kóship ketken. Izraildiń "Qaita oralý týraly" zańyna súienip Izrail pasportyn alǵan.
Roman Abramovich álemniń kóptegen elderindegi evreiler qaýymdastyǵynyń jobalaryn belsendi qarjylandyrady. Ózi Reseidegi evreiler qaýymdastyǵynyń qamqorshylar keńesi men Evrei mýzeii jáne toleranttylyq ortalyǵyn basqarady. Público jazýyna qaraǵanda keiingi jyldary Roman Abramovich Portý qalasyndaǵy Portýgaliia evrei qaýymdastyǵymen yntymaqtasqany baiqalǵan.
