Qazaqstanda eńbek migratsiiasy men bosqyndar máselesine qatysty suraqtar azamattyq vedomstvonyń qaraýyna beriledi. Bul týraly QR Ishki ister ministrliginiń ókili Shuǵyla Berikqyzy málim etti, dep habarlaidy QazAqparat.
«Memleket basshysy Qosym-Jomart Toqaev qazirgi ýaqytta eńbek migratsiiasy jahandyq mańyzǵa ie ekenin jáne ol eldiń áleýmettik-ekonomikalyq damýymen tyǵyz bailanysty ekenin birneshe ret basyp aitty. Osy sebepten Ishki ister ministrliginiń eńbek migratsiiasyn retteý fýnktsiialarynyń úshten biri QR Eńbek jáne halyqty áleýmettik qoldaý ministrliginiń quzyretine beriledi», - dedi Berikqyzy IIM-de onlain ótken baspasóz máslihatynda.
Qazaqstanda memlekettik basqarý júiesin odan ári jetildirý sharalary týraly tiisti Jarlyqqa Memleket basshysy 19 shildede qol qoidy.
«Kelesi jyly 1 qańtardan bastap IIM migratsiialyq protsesterdi retteý jáne monitoringteý júiesine qarasty sharalardy ázirleýmen, vedomstvoaralyq úilestirýmen, bosqyn mártebesin berýmen jáne eńbek migranttaryna ruqsat berý isimen ainalyspaidy», - deidi ol.
Onyń aitýynsha, atalǵan ózgerister quqyq qorǵaý júiesin reformalaý jáne ishki ister organdaryn quzyretine jatpaityn fýnktsiialardan bosatý sharalary aiasynda júzege asyrylmaq.
Migratsiia salasy zańnamanyń saqtalyp, eńbek migranttarynyń quqyǵyn qorǵaý úshin azamattyq vedomstvonyń qaramaǵyna berilip otyr.
«Osylaisha bizdiń ministrlik eldiń migratsiia salasyndaǵy memlekettik basqarý júiesin ońtailandyrýdan habardar bolyp otyrady. Eńbek migratsiiasynyń shekaradan zańsyz ótýi, zańsyz kelgen immigranttardy elden shyǵarý, QR-na kelýge ruqsat berý men qujattandyrý IIM-niń quzyretinde qala beredi», - dedi IIM ókili.
