12 mamyr kúni álem boiynsha Halyqaralyq medbikeler kúni atalyp ótedi. Ataýly kúnge orai Nur-Sultan qalalyq «Kópsalaly meditsina ortalyǵy» operatsiia bólimshesiniń meiirbikesi 27 jastaǵy Gúljaýhar Semserhan meiirbikeliktiń qyr-syry týraly QazAqparat tilshisine suhbat bergen edi.
Gúljaýhar Semserhan 2011 jyly Astana qalalyq meditsina kolledjin bitirgen. 2014 jyldan beri elordada burynǵy Onkologiia ortalyǵy, qazirgi «Kópsalaly meditsina ortalyǵynyń» operatsiia bólimshesinde meiirbike bolyp qyzmet etedi. Qazir koronavirýs epidemiiasyna bailanysty qalalyq ftiziopýlmonologiia ortalyǵynyń infektsiia bólimindegi izoliatorda jumys istep jatyr.
«Úsh aidan beri osy ortalyqta koronavirýs infektsiiasyn juqtyrǵan naýqastardy emdep jatyrmyz. Árine, bastapqyda ózimizde de qorqynysh boldy. Naýqastar da, mamandar da bul keselmen alǵash ret betpe-bet keldik. Birinshi aýysymdaǵy jumysymyz tańǵy 8-de bastalady. Keshki altyǵa deiin 5 ret naýqastardyń dene qyzýyn ólsheimiz, taǵaiyndalǵan dárilerdi taratyp, ine egemiz, tamyrǵa dári jiberemiz. Tańerteń jáne keshke naýqastardy rentgen, kardiotokografiiaǵa ázirlep, analizge synama alamyz. Ekinshi aýysymǵa kelgen meiirgerler osylai tańǵa deiin kezekshilik etedi», - dep túsindirdi meiirbike QazAqparat tilshisine bergen suhbatynda.
Virýs juqtyrý qaýpi joǵary topta jumys istegeni úshin meiirbikege ai saiyn 850 myń teńge ústemeaqy tólenip jatyr.
«Bul jerde memlekettiń meditsina mamandaryna qoldaý kórsetkeni úshin rahmet aitqym keledi. Sáýirden bastap elordadaǵy «Hilton» qonaqúiinde turyp jatyrmyz. Biz naýqastarmen bailanysqan adamdar sanalamyz, sondyqtan otbasymyzǵa emes, qonaqúige toqtadyq. Munda da óz bólmemizden basqa jaqqa, basqa qabatqa barýǵa bolmaidy. Tamaqty da bir rettik ydyspen, bir rettik staqanmen beredi. Munyń barlyǵy qaýipsizdik sharalaryn saqtaý úshin jasalýda», - deidi G. Semserhan.
Onyń aitýynsha, halyqaralyq meiirbikeler kúnin ár meditsinalyq mekeme nazardan tys qaldyrmaýǵa tyrysady. Mekeme, basshylyq tarapynan eńbegimen elengen meiirbikelerge quttyqtaý men marapat qaǵazdary beriledi.
«Qazaqstanda meiirbikeler óte tapshy, qoǵamda bul mamandardy jaqsy qadirleidi. Elimizde meiirbikelerdi bakalavr, magistratýra, doktorantýra dárejesinde oqytýdyń ózi - bizge berilgen úlken qurmet dep oilaimyn. Sońǵy 3-4 jylda meditsinalyq kolledjder Joǵarǵy meditsinalyq kolledjder dep atalyp, Nazarbaev ýniversiteti men Meditsinalyq akademiiada joǵarǵy bakalavr dárejesinde diplom berý úrdisi bastaldy. Álemniń damyǵan elderindegi bul tájiribe Qazaqstanǵa da keldi. Buǵan deiin meiirbikeler mansaby aǵa meiirbike nemese bas meiirbike dárejesimen shekteletin edi. Al qazir odan da joǵarǵy ǵylymi dárejelerdi ala alady», - deidi maman.
Sonymen birge, Gúljaýhar meiirbikelik qyzmettiń basty artyqshylyqtaryn aityp berdi.
«Qazir birqatar mamandyq jańa tehnologiialarǵa tótep bere almai, joǵalýdyń aldynda tur. Al meiirbike qyzmetin eshqandai tehnika, esh robot almastyra almaidy, jyldar boiy zaman talabymen jańaratyn ómirsheń, ózekti mamandyq bolyp qala beredi. Onyń artyqshylyǵy - birden-bir suranysqa ie mamandyq bolýynda. Iaǵni, kez kelgen eldimekende nemese qalada laiyqty jumys isteýge bolady. Bolashaqta meiirbikeler shetelde tájiribe almasý múmkindigi kóbirek berilse eken deimin. Shetelde biliktiligin jetildirip, aýrýhanalarynda tájiribe almassa dep oilaimyn», - dep pikir bildirdi ol.
Gúljaýhar Semserhan 7 jylǵa jýyq ýaqyt boiy onkologiialyq ortalyqta qyzmet keledi. Ol operatsiialyq bólimde hirýrg assistenti retinde otaǵa qatysyp, quraldardy, apparattardy daiyndaidy.
«Onkologiiany emdeý isi de úzdiksiz damyp keledi. Buryndary otada úlken tilik kesiletin bolsa, qazir laparoskopiia jolymen jasalady. Kóptegen naýqastar keselge kóńil bólmei, keshigip keledi. Sol jaǵy qiynǵa soǵady. Osyndai aýrýlardyń aldyn alý maqsatynda qazir túrli skrirngter uiymdastyrylady. Deni saý adam jylyna bir ret densaýlyǵyn teksertip turý kerek. Onyń ústine, meditsinalyq saqtandyrý aiasynda tirkelgen emhanada barlyq tekserýler tegin júrgiziledi», - dep keńes berdi meiirbike.
Sóz sońynda meiirbike Qazaqstandaǵy barsha áriptesterin búgingi kásibi merekesimen quttyqtady.
«Barsha áriptesterimdi, tótenshe jaǵdaida qyzmet etip jatqan barlyq mekemelerdi búgingi merekemen quttyqtaimyn! Meiirbikeniń túp maǵynasy - meiirim bolǵandyqtan, mamannyń boiynda baýyrmaldyq, meiirim, kásipke adaldyq pen janashyrlyq qasietteri bolýy kerek. Naýqastyń tolyq jazylyp ketýi meiirbikeniń jumysyna, kútimine tikelei bailanysty. Meiirbike men dárigerdi bólip qaraý múmkin emes. Olar birge jumys isteý arqyly ǵana emdeý isinde nátijege qol jetkizedi. Barsha qazaqstandyqtarǵa jáne memleket tarapynan berilip jatqan kómekke alǵys bildiremin», - deidi Gúljaýhar Semserhan.
Aita keteiik, halyqaralyq medbikeler kúni Qyrym soǵysynda (1853-1856) sanitarlar jasaǵyn uiymdastyryp, olarǵa basshylyq etken aǵylshyn medbikesi - Florens Naitingeildiń týǵan kúninde - 12 mamyrda jyl saiyn toilanady. Ár eki jyl saiyn Halyqaralyq Qyzyl Krest jáne Qyzyl Jarty Ai qozǵalysy eń úzdik 50 medbikege Florens Naitingeil atyndaǵy medaldi tabystaidy.
