Talǵar aýdanynda turatyn kóp balaly otbasy qonystoiyn toilady. «Álisher» sharýa qojalyǵynyń jetekshisi Asqar Súleimenov metsenat retinde óz qarjysyna Qýanysh jáne Maqpal Janbolattar otbasyna úi satyp alyp berdi. Bul otbasynyń 2011, 2013, 2014, 2016 jáne 2018 jyly týǵan bes balasy bar.
Kóp balaly otbasynyń turmystyq qiyndyqtardy keship jatqanyn áleýmettik jeliden kórgen oblys ákimi Amandyq Batalov Talǵar aýdanynyń ákimine jas otbasyǵa járdem kórsetý múmkindikterin qarastyrý týraly tapsyrma bergen bolatyn. Áleýmettik jeli jariialanymyna orai «Álisher» sharýa qojalyǵynyń jetekshisi Asqar Súleimenov kómek qolyn sozýdy jón kórgen. Sóitip T. Rysqulov aýylynan barlyq qolaily jaǵdaiy jasalǵan jańa úsh bólmeli úi tabylyp, sol kúni metsenat sol úidi 9,5 mln. teńgege satyp aldy.
Jas otbasyn jańa qonysymen quttyqtaýǵa oblys ákimi Amandyq Batalov bardy. Kóp balaly otbasy buǵan deiin ózderi jalǵa alyp turǵan buryn monsha retinde paidalanylǵan jataqtan jańa úige kóshirildi. Metsenat otaǵasy Qýanysh Janbolatqa jańa baspananyń kilti men qujattaryn tabys etti. Aýdan ákimi kómek retinde azyq-túlik, kómir jetkizip, 3 ailyq sábige qolarba jáne basqa da balalaryna oiynshyqtar alyp berdi.
Óz kezeginde jas ata-ana kórsetilgen kómek úshin shyn júrekten rizashylyqtaryn jetkizdi.
Atap ótsek, Janbolattar otbasy Uiǵyr aýdanynda tirkeýde, bes balaǵa járdemaqy alady. Qýanysh balalar úiinde ósken, sol qolynda saýsaqtarynyń jartysy joq, sol kózi kórmeidi. Biraq búginge deiin múgedektikke qujat tapsyrmaǵan. Osyǵan bailanysty Talǵar aýdandyq ákimdiginiń kómegimen ataýly áleýmettik kómek alýǵa jáne múgedektik boiynsha járdemaqy rásimdeýge qujattar jinaqtalyp, daiyndalýda.
