Otbasy kúni qarsańynda Qazaqstan Respýblikasynyń Memlekettik hatshysy Qyrymbek Kósherbaevtyń qatysýymen onlain formatta «Mereili otbasy» ulttyq konkýrsynyń laýreattaryn marapattaý rásimi ótti, dep habarlaidy "Ult aqparat".
Memlekettik hatshy rásimdi asha otyryp Memleket basshysy Qasym-Jomart Toqaevtyń quttyqtaýyn oqydy, onda konkýrstyń óskeleń urpaqty tárbieleýdegi jáne otbasylyq qundylyqtardy nyǵaitýdaǵy mańyzdylyǵy atap ótilgen.
Biyl konkýrs ótkizýdiń jańa tásilderi engizildi, oǵan sáikes endi jyl saiyn respýblika boiynsha 17 úzdik otbasy anyqtalatyn bolady. Jalpy aǵymdaǵy jyly óńirlik konkýrstyq komissiialarǵa barlyǵy 2 768 ótinim berildi (68,7% aýyldyq otbasylar, 31,3% qalalyq otbasylar). Jańa erejelerge sáikes ótinimder tek otbasylardan ǵana emes, zańdy tulǵalardan da qabyldandy.
Marapattaý rásimi barysynda laýreat otbasylar óz áserlerimen bólisti.
Osylaisha, Aqmola oblysynyń kóp balaly qandas-otbasynyń basshysy Qurmet Nursultan Elbasy men Prezident Qasym-Jomart Toqaevtqa qandastarymyzdy qoldaǵany jáne pedagogtardyń mártebesin kótergeni úshin alǵys aitty.
SQO jeńimpazy Kreidýn otbasy – bes balany asyrap alyp, tárbielep otyrǵan úilesimdi jáne tatý otbasynyń úlgisi. Inna Kreidýn onyń otbasy basqa da kóptegen adamdar siiaqty Qazaqstandaǵy aýyldardyń órkendeýi men damýy úshin barlyq kúsh-jigerin salatynyn atap ótti.
Almaty qalasynyń dárigerler áýletiniń ókili, «ASTANA EKOLAIF» EKU meditsinalyq ortalyǵynyń bas direktory Ahmetova Almagúl Memleket basshysynyń bastamasymen júzege asyrylyp jatqan «Ańsaǵan sábi» baǵdarlamasynyń jáne balasyz otbasylardy memlekettik qoldaý sharalarynyń ózektiligin atap ótti.
Túrkistan oblysynyń Jamalovtar otbasy óńirde aýyl sharýashylyǵyn belsendi damytýda. Biyl erli-zaiyptylar birge ómir súrýdiń 30 jyldyǵyn atap ótedi. «Bizdiń otbasymyz – el Táýelsizdiginiń qurdasy!»,- deidi otaǵasy Asylbek Tursynbaiuly.
Budan basqa, Otbasy kúni qarsańynda elordada Aidos Nurbaev pen Arai Saparǵaliqyzy otbasy neke kýáligin aldy. Aidos - jeke kásipker, Arai - jetekshi injener-jobalaýshy. «Mereili otbasy» baiqaýy - biz úshin jaqsy belgi! Biz boiymyzdy túzegimiz keletin úlgili otbasylardyń arasynda bolǵanymyzǵa qýanyshtymyz!» - dep, jas jubailar oilarymen bólisti.
2016 jylǵy ulttyq konkýrstyń jeńimpazdary Aqtóbe oblysynyń Nusqabaevtar otbasynyń ókili Qairat Nusqabaev bul konkýrstyń onyń otbasy músheleriniń barlyǵyna úlken jaýapkershilik júktegenin aitty. «Osy joǵary mártebeni abyroimen saqtaý - bizdiń paryzymyz», - dep atap ótti ol jeńimpaz otbasylar men jas jubailarǵa baqyt pen myqty densaýlyq tilei otyryp.
Is-sharaǵa sondai-aq Qazaqstan Respýblikasy Prezidentiniń janyndaǵy Áielder isteri jáne otbasylyq-demografiialyq saiasat jónindegi Ulttyq komissiianyń tóraiymy, Parlament Májilisiniń depýtaty Lazzat Ramazanova, aqparat jáne qoǵamdyq damý ministri Aida Balaeva, oblystardyń, Nur-Sultan, Almaty jáne Shymkent qalalarynyń ákimderi qatysty.
El Prezidenti atynan laýreat otbasylarǵa estelik syilyqtardy óńirlerdiń ákimderi tabys etti.
Esterińizge sala keteiik, «Mereili otbasy» Ulttyq baiqaýy Elbasynyń bastamasymen 2013 jyly qurylǵan bolatyn. Baiqaýdyń maqsaty – otbasy institýtyn, otbasylyq qundylyqtardy nyǵaitý, bala tárbiesindegi ata-analardyń jaýapkershiligin arttyrý, qazaqstandyq otbasynyń jaǵymdy imidjin nasihattaý.
