Tanymal qazaqstandyq kásibi boksshy Gennadii Golovkin FOX News radiosyna qyzyqty suhbat berdi, dep habarlaidy QazAqparat Sports.kz internet-portalyna silteme jasap.
- Siz bokspen qashannan ainalysasyz?
- 8-9 jasymnan bastap. Inim ekeýmiz birge bardyq.Biz egiz bolǵandyqtan únemi birge júretin edik.
- Bokspen ainalysa bastaǵan kezde ata-anańyz ne oilady?
- Qýanǵan joq. Qazir olarǵa ne úshin unamaǵanyn túsinip júrmin, sebebi olar meniń fýtbolmen nemese tennispen shuǵyldanǵanymdy qalady. Ol jaqtaǵy adamdar múldem basqa.
- Siz Qazaqstanda neshe jasqa deiin turdyńyz?
- 22 jasqa deiin
- Siz qazir Los-Andjeleste júrsiz. Qandai aiyrmashylyq bar?
- Aiyrmashylyq kóp. Eki jaqty salystyryp, birdeńe jaqsy, birdeńe jaman degim kelmeidi. Ártúrli oryndar, ártúrli adamdar....
- Siz «Kanelo» Alvarespen eki ret aiqastyńyz, endi úshinshi jekpe-jekti qalaisyz. Biraq trilogiia keiinge qalyp jatyr, sebebi ol eshkimmen aiqaspaǵan soń titýlynan aiyryldy. Siz jekpe-jekke shyqqyńyz keletin adam sol ma?
- Iá, ol - men bokstasqym keletin basty qarsylasym. Biz onymen qyrkúiekte aiqasqymyz keldi. Meksikanyń Táýelsizdik kúni – 14 qyrkúiekte. Aqsha kóp túsýshi edi. Bilmeimin, ol nege tiimsiz dep oilaǵanyn.
- Múmkin, qorqatyn shyǵar?
- Jol, ol qoryqpaidy. Eshkim de qoryqpaidy. Múmkin, ol uzaǵyraq chempion bolyp qalǵysy keletin shyǵar, synǵa túskisi kelmeitin bolar.
- Biraq, ol bas tartqandyqtan orta salmaqtaǵy IBF álem chempiony titýly bos tur. Siz sol úshin Derevianchenkomen aiqasasyz. Sizderdiń jekpe-jekterińiz qashan?
- 5 qazan.
- Ekeýińizdiń bireýińiz bos turǵan álem chempiony titýlyn iemdenedi ǵoi?
- Iá.
- Keiin «Kanelo» belbeýdi ózine qaitarǵysy kelse aiqas ótedi me?
- Múmkin. Ony aitý qiyn. Bul - biznes. Bir kúni daiynmyn dep oilaisyń, kelesi kúni daiyn emespin deisiń. Bul - ómir.
- Siz ony nokaýtqa túsiresiz be?
- Joq, - bul qiyn aiqas, joǵary deńgeidegi jekpe-jek. «Iá, ony jeńemin» dep aitý ońai, biraq men ózimniń, ol óziniń jaǵdaiyn jaqsy biledi. Aiqas qiyn bolady. Boks – sporttyń qiyn túri, bir soqqy ómirińdi ózgertýi múmkin. Tek qana aiqasty emes, sportshynyń búkil ómirin ózgertýi múmkin.
- Siz - óte qarapaiymsyz. Kóptegen boksshylar, Muhammed Álidiń ózi de qarsylasy týraly jaman sózder aitqandy jaqsy kóretin. Qarsylasynyń miyna kirip, onyń tepe-teńdigin buzýdy qalaityn. Siz - ondai emessiz.
- Men - ondai emespin. Meniń barym osy, bireý siiaqty bolǵym kelmeidi. Tresh-tokty unatpaimyn. Men úshin boks – sport, men bokstyń jankúierimin, men naǵyz chempiondardy qurmetteimin.
- Siz DAZN-men kelisim jasadyńyz. Olar sizge jaqsy aqsha tóleidi. Siz aqshany basqara alasyz ba? Sportshylardyń óz aqshasyn kólikterge, qymbat buiymdarǵa, saýyq keshterge jumsaǵan oqiǵalary kóp bolǵan.
- Meniń otbasyma, balalaryma, ózime az qarajat jumsaimyn.
- Demek, eshqandai «Rolls-Rois» kerek emes pe?
- Mende «Rolls-Rois» boldy. Bul - qaljyń.
- Siz qazir Los-Andjeleste basseini bar záýlim úide turyp jatsyz ba?
- Joq, biraq munda ómir súrý óte qymbatqa túsedi.
- Jubaiyńyz sizdiń aiqastaryńyzǵa barady ma?
- Joq, eshqashan. Bul - onyń emes, meniń isim.
- Ulyńyzdyń boksqa barǵanyn qalaisyz ba?
- Joq. Ol aqyldy, tórt til biledi – óskeleń urpaq. Men – «burynǵy mekteptiń» adamymyn, bizdiń ómirimiz ártúrli. Onyń jaǵdaiy basqa.
- Qai jasqa deiin bokstaspaqshysyz?
- Bilmeimin. Qazir 10 jyl burynǵydai kúsh-qýatym da, jyldamdyǵym da bar. Oǵan qosa tájiribem, tanymaldyǵym, demeýshim, jańa ideiam bar. Onyń qandai ideia ekenin aitpaimyn – bul boks, qaýipti sport, jaǵdai kez kelgen kezde ózgerýi múmkin.
- Siz eshqashan nokaýtqa túsip kórmedińiz. Qalaisha?
- Genetika, meni qoldaityn ata-anam, jankúierlerim. Salaýatty ómir salty.
- Siz 37 jasyńyzda ózińizdiń formańyzdy saqtap qalǵansyz. Jii jattyǵasyz ba?
- Kún saiyn eki ret jattyǵamyn. Birinshisi – 3 saǵat, ekinshi ret – 4. Kúnine 7 saǵat. Tipti, táýligine 24 saǵat jattyǵamyn, sebebi uiqyńdy, dietańdy qadaǵalap otyrýyń kerek. Fokýsty joǵaltsań, bári bitti.
- Qazaqstanǵa jii barasyz ba? Ol jaqta ómir qalai?
- Keide baryp turamyn, ol jaqta dostarym bar. Maǵan saiahattaǵan unaidy. Reseide – Máskeý, Sankt-Peterbýrg, men tildi bilgendikten maǵan ol jaqta júrgen jeńil. Aqyldy adamdarmen kezdeskendi unatamyn. Qytai, Malaiziia, Japoniia – keremet oryndar. Ol basqasha álem.
- Sizge qai jerde aiqasqan unaidy?
- «Medison Skver Gardende». Ol - jer bokstyń Mekkesi. Onda úzdik aiqastar ótti – Áli, Taison judyryqtasqan. Onyń atmosferasy basqasha, barlyq kórermender – boks sarapshylary, olar úshin aiqasqan unaidy.
