Áskerde Otan aldyndaǵy boryshyn óteý kezinde aýyr jaraqat alyp, uzaq ýaqyt em qabyldaǵannan keiin ómirden ótken 24 jastaǵy Erbaian Muhtardyń reabilitolog-dárigeri áleýmettik jelide tebireniske toly jazba jariialady, dep habarlaidy ult.kz kznews.kz aqparat portalyna silteme jasap.
Erbaiannyń ońalý protsesine qatysqan reabilitolog Ulpan Sovetbekqyzy marqumnyń ómirge degen qushtarlyǵy men qaisar minezin erekshe atap ótti. Onyń aitýynsha, jas sarbaz sońǵy sátine deiin saýyǵyp ketýge úmitin úzbegen.
«Erbaiannyń janarynda úmit bar edi. Saýyǵyp ketýge, bolashaqqa, ómirge degen úmit. Bolǵan jaǵdaidyń qaiǵysy men ádiletsizdigin sózben jetkizý óte qiyn. Men onyń ǵana emes, jaqyndarynyń da jan azabyn kórdim. Árbir kishkentai jetistik bizge qýanysh syilaityn. Biz jospar qurdyq, sendik, úmittendik. Biraq taǵdyr basqasha sheshti...» – dep jazdy dáriger.
Mamannyń sózinshe, Erbaian emdeý kezeńinde erekshe tózimdilik tanytyp, ainalasyndaǵylarǵa rýhynyń myqtylyǵyn dáleldei bilgen.
«Erbaian, sen óte qaisar, batyl, meiirimdi ári jaryq jan ediń. Sońyna deiin kúrestiń jáne naǵyz rýh kúshiniń qandai bolatynyn kórsettiń. Men úshin sen jai ǵana patsient emes ediń. Kún saiynǵy eńbegimiz seniń bir kúni qaitadan aiaqqa turyp ketetinińe degen ortaq úmitpen ótetin. Ókinishke qarai, bul arman oryndalmady», – dedi ol.
Jazba sońynda dáriger Erbaiannyń qazasyn qabyldaý ózine de aýyr tigenin aityp, onyń endi aýyrsyný men azaptan ada tynyshtyq tapqanyna sengisi keletinin jetkizdi.
«Búgin júregimde úlken bos keńistik qaldy. Seniń endi aramyzda joq ekenińdi qabyldaý óte aýyr. Biraq qazir sen aýyrsyný men azaptan ada jerde tynyshtyq taptyń dep sengim keledi... Qushaqtadym seni», – dep túiindedi reabilitolog.
