Qazaqstan Respýblikasy Parlamenti Senatynyń Tóraǵasy Dariǵa Nazarbaeva parlamenttik tyńdaýǵa daiyndyq barysynda memlekettik qorǵanystyq tapsyrysty ornalastyrý máseleleri boiynsha memlekettik organ ókilderimen kezdesý ótkizdi, dep habarlaidy "Ult aqparat" joǵary palatanyń baspasóz qyzmetine silteme jasap.
Jiynǵa QR Parlamenti Senatynyń depýtattary, qorǵanys vedomstvolary, indýstriia jáne infraqurylymdyq damý, ulttyq ekonomika jáne elimizdiń jeńil ónerkásip salasynyń ókilderi qatysty.
Dariǵa Nazarbaeva elimizde ónim óndirýge barlyq múmkindik baryn alǵa tartty.
«Másele resýrstardyń jetispeýinde, jalpy atalǵan salany damytýdaǵy memlekettik strategiia jetkilikti deńgeide oilastyrylmaǵan. Sondai-aq, biz ishki naryqtyń sapasyz ónimderge tolýyna jaibaraqat qaraimyz», - dedi ol.
«Qaz Textile Industry» direktorlar keńesiniń tóraǵasy Baýyrjan Jamalov memlekettik qorǵanystyq tapsyrys jáne qorǵanys kúshi qurylymynyń satyp alý salasyndaǵy júielengen problemalar týraly aitty.
«Tapsyrys berýshiler ónimdi óndirýge jumsalatyn ýaqytty eseptemei, ony az ýaqytta jetkizý talabyn qoiady. Shikizattan daiyn ónim shyǵarý ýaqytyn eskermeidi», - deidi ol.
Sondai-aq, otyrysqa qatysýshylar memlekettik qorǵanystyq tapsyrys alýshylardyń tehnikalyq erekshelik quramyndaǵy máselelerdi talqyǵa saldy. Jeńil ónerkásip ókilderi tehnikalyq talaptardyń kórsetilýi tiistigin jáne ony tapsyrys bergen soń ózgertpeý kerektigin airyqsha aityp ótti. Odan bólek, shikizat boiynsha da kezek kúttirmes máseleler tur.
«Memlekettik qorǵanys tapsyrysyna qatysty zańnama otandyq óndirilgen shikizatty qoldanýdy mindettemeidi», - dedi B. Jamalov.
Senat basshysynyń aitýynsha, memlekettik organdardyń jeńil ónerkásip salasy boiynsha satyp alýǵa jumsalatyn biýdjet qarajaty problemasyn keńinen qaraý mańyzdy. «Memlekettik tapsyrys týraly habarlandyrý jariialap, ony arzan baǵamen satyp alýmen shektelip, ishki vedomstvolyq suraqtardy ǵana sheship qoimaý qajet. Memlekettik tapsyrysqa bólingen qarajat, bizdiń ekonomikamyzǵa, óz kásipkerlerimizdiń aiaǵyna tik turýyna jumys isteýi tiis. Iaǵni jańa jumys oryndaryn ashyp, otandyq ónimderdiń jandanýyna yqpal etýi qajet. Qazirgi naryqtaǵy otandyq taýarlardyń sapasy óte jaqsy. Bizdiń mamandar eshkimnen kem emes, óz isteriniń sheberi», - dedi D. Nazarbaeva.
Sonymen qatar, jeńil ónerkásip salasynyń ókilderi qazaqstandyq áskeri qorǵanys kúshi qurylymdarynyń kóbinese importtyq matadan tigilgen ónimderdi tańdaitynyn málim etti.
Óz kezeginde D. Nazarbaeva qorǵanys jáne ásker salasyn azyq-túlik jáne basqa da qajetti buiymdarmen tek otandyq óndirýshilerdiń qamtamasyz etý kerektigin erekshe aityp ótti. «Bul ulttyq qaýipsizdiktiń ajyramas bóligi. Ulttyq qaýipsizdik strategiiasy – ol óz azamattarymyzdy otandyq ónimmen qamtamasyz etý. Ol úshin bizde barlyq qajetti adami, materialdyq jáne qarjylyq resýrstar bar. Ázirge ár mekemeniń qyzyǵýshylyǵy ártúrli bolyp otyr», - deidi ol.
Senat Tóraǵasy jeńil ónerkásip óndirýshilerine kúrdelengen máselelerdi sheshý maqsatynda Úkimetpen birlesip, sala standarty men metodologiiasyn retteýdi usyndy.
Kezdesýdi qorytyndylai kele, Parlament Senatynyń Tóraǵasy Ekonomikalyq saiasat, innovatsiialyq damý jáne kásipkerlik komitetine jiynda kóterilgen máselelerdi zerttep, Parlamenttik tyńdaýǵa ázirleýdi tapsyrdy.
