QR Qarjy ministri Erulan Jamaýbaev memlekettik satyp alý salasynda bir kózden satyp alý kólemi 50% qysqaratynyn málim etti, dep habarlady "QazAqparat" HAA.
«Jaqynda memlekettik satyp alý máseleleri boiynsha birqatar zańnamalyq túzetýler kúshine endi. Olar bir kózden alý tásilimen memlekettik satyp alýdy júzege asyrýdyń 6 negizdemesin alyp tastady.
Bul bir kózden satyp alýdyń barlyq kóleminiń shamamen 50%-in quraidy.
Budan basqa, tapsyrys berýshiniń satyp alýdyń básekelestik tásilderin basym júzege asyrýy jáne bir kózden satyp alý boiynsha tapsyrys berýshiniń birinshi basshysynyń derbes jaýapkershiligi týraly norma kózdelgen», - dedi ministr Úkimet otyrysynda.
Onyń aitýynsha, ashyqtyqty qamtamasyz etýdiń nátijesinde tikelei sharttar jasasý arqyly bir kózden memlekettik satyp alý úlesi 2015 jylǵy 92%-ten 2021 jyly 45%-ke deiin tómendegen.
«Óz kezeginde, Qarjy ministrligi bir kózden satyp alýdy qoldanýdyń negizdiligine baqylaýdy qamtamasyz etedi», - degen vedomstvo basshysy «Samuryq-Qazyna» ulttyq ál-aýqat qory» AQ jumysyna da osy turǵyda ózgerister enitinin aitty.
«Osy jyldan bastap Qordyń jáne barlyq ulttyq kompaniialardyń satyp alýlary «Kvazimemlekettik sektordyń jekelegen sýbektileriniń satyp alý týraly» Zańmen retteledi.
Búgingi tańda Qordyń direktorlar keńesi satyp alý sharttayn bekitý úshin Qarjy ministrliginiń kelisimin alý kerek.
Qordyń jáne onyń enshiles kompaniialarynyń satyp alýyn júzege asyrýdyń búkil protsesin ózge ishki qujattarǵa silteme jasamai, bir qujat deńgeiinde qaralatyn bolady», - dedi Erulan Jamaýbaev.
Aita keteiik, Memleket basshysy Qasym-Jomart Toqaev Parlament Májilisiniń jalpy otyrysynda kvazimemlekettik sektordyń satyp alýy salasynda karteldi kelisimder jasasý keńinen tarap ketkenin eskertti.
