QR Ulttyq damý jospary aiasynda memlekettik organdar jyl sońyna deiin jańa júiege kóshýdi josparlap otyr.
Bul týraly QR Strategiialyq josparlaý jáne reformalaý agenttiginiń tóraǵasy Qairat Kelimbetov aityp berdi, dep habarlaidy QazAqparat.
9 naýryzda Memleket Basshysy Qasym-Jomart Toqaevtyń Jarlyǵymen elimizdiń 2025 jylǵa deiingi damýynyń ulttyq jospary bekitilgen edi.
«QR Memlekettik Strategiialyq josparlaý júiesiniń negizin qalaýshy tarmaǵy – Tuńǵysh Prezident – Elbasynyń «Qazaqstan – 2050» Strategiiasynda belgilengen mindetterdi iske asyrý bolyp otyr. Strategiiany damytýda orta merzimdi strategiialar qabyldanady. Olardyń biri – Ulttyq damý jospary bolady. Ulttyq damý josparynyń naqty basymdyqtary bolýy úshin Prezident Jarlyǵy qabyldandy, onda jalpyulttyq basymdyqtar kórsetildi. Jalpyulttyq basymdyqtar – ekonomikany, bizdiń áleýmettik salamyzdy damytýdyń negizgi baǵyttarynyń arnaiy tizbesi, olar aldaǵy bes jylǵa qandai maqsattar qoiatynymyzdy, oǵan qalai qol jetkizetinimizdi jáne qandai da bir baǵytqa jeke jaýapty bolatynymyzdy anyq túsiný úshin qajet», - dedi Qairat Kelimbetov Ortalyq kommýnikatsiialar qyzmetinde ótken baspasóz máslihatynda.
Sonymen birge, spiker jospar aiasynda memlekettik organdardyń jańa júie boiynsha qashan jumys isteitinin aitty.
«Ózgerister aiasynda kóptegen qujattar qysqartyldy jáne tutastai alǵanda, júieniń ózi shaǵyn ári qonymdy boldy. Biz qazir memlekettik organdar jańa júiege kóshetin joldyń basynda turmyz. Kóshý jyl sońyna deiin aiaqtalady. Al negizgi bóligi – ulttyq jobalarǵa, jańa biýdjettik baǵdarlamalarǵa kóshý 1 qyrkúiekke deiin aiaqtalady», - dedi Q.Kelimbetov.
Aita keteiik, elimizdiń 2025 jylǵa deiingi damýynyń ulttyq josparynda elimizdiń jańa ekonomikalyq baǵytynyń negizgi mindetteri men parametrleri aiqyndalǵan.
