Foto: Mádeniet jáne aqparat ministrligi
Ábilhan Qasteev atyndaǵy Qazaqstan Respýblikasynyń Memlekettik óner mýzeiinde belgili qazaqstandyq sýretshi, «Qurmet» ordeniniń iegeri, QR Qolónershiler odaǵynyń tóraǵasy Aijan Bekqulovanyń 70 jyldyq mereitoiyna arnalǵan «Tamasha adamdar ómiri» atty jeke kórmesi ashyldy, dep habarlaidy Ult.kz Mádeniet jáne aqparat ministrligine silteme jasap.
Kórmede Aijan Bekqulovanyń 1990-shy jyldardan bastap qazirgi ýaqytqa deiin jasaǵan júzden astam týyndysy usynylǵan.
Retrospektivalyq ekspozitsiiada toqyma, kiiz basý, qasietti qýyrshaqtar, zergerlik áshekeiler, etnikalyq kiimder, sondai-aq metaldan, keramikadan, aǵashtan jáne kiizden jasalǵan, basqa sheberlermen jáne sýretshilermen birlesip jasalǵan jumystar usynylǵan.
"Bul jeke kórme jinaqtalǵan tájiribeniń, túrli elderdiń mádenietterimen tanysýdyń, túrli tehnologiialardyń kórkemdik kórinisteriniń ereksheligi týraly kóp jyldyq oilardyń, shyǵarmashylyq adamdarmen áńgimeler men suhbattardyń nátijesi. Kórmege qoiylǵan jumystar ony ulttyq mádeni kodtyń genetikalyq sezimine negizdelgen jáne qazirgi zamannyń yrǵaqtarymen, nysandarymen, belgilerimen, oi úlgilerimen baiytylǵan ózindik avtorlyq qaitalanbas stilin qalyptastyrǵan daryndy sýretshi retinde kórsetedi", - delingen habarlamada.
«Men árqashan erekshe adamdardy kezdestirý baqytyna ie boldym. Olar álemge jáne jeke ómirge degen meniń kózqarasymda sheshýshi ról atqarady. Kisini tań qaldyratyn, shabyttandyratyn, qýantatyn jáne dúnietanymyn ózgertetin ol - adamdar. Olar úiretedi, aqyl-keńes beredi, sizdiń pikirińizdi surap, óz oiymen bólisedi. Meniń jeke kórmem – maǵan kóńil bólgen, qarym-qatynas, qýat bergen, tek jaǵymdy sezimder ǵana emes, sonymen birge shyǵarmashylyǵyma qushtarlyq syilaǵan adamdarǵa bildirgen úlken alǵysymnyń belgisi. Menimen birge shyǵarmashylyq yntymaqtastyqta jumys istegenderge rahmet», - deidi Aijan Bekqulova.
Ekspozitsiia qarasha aiynyń 5-ne deiin jalǵasady.
Aijan Bekqulova 1954 jyly 27 qyrkúiekte Almaty qalasynda dúniege kelgen. 1976 jyly Halyq sharýashylyǵy institýtyn qyzyl diplommen bitirip, sodan keiin Qazaqfilm kinostýdiiasyna Kinokartina direktory qyzmetine jumysqa ornalasty. Sergei Solovev, Iraklii Kvirikadze, Sergei Bodrov siiaqty kórnekti kinomatografistermen jumys istedi.
1981 jyly Aijan Bekqulova Máskeýdegi KSRO GOSKINO janyndaǵy Búkilodaqtyq kinematografiia shyǵarmashylyǵy jáne basshy qyzmetkerleriniń biliktiligin arttyrý joǵary kýrsyn aiaqtap, kinostýdiiadaǵy jumysyn jalǵastyrdy.
1993 jyly T. Júrgenev atyndaǵy teatr-kórkemsýret institýtyn «Monýmentaldy toqymashylyq» mamandyǵy boiynsha bitirdi.
Sol jyldan ol «Shyǵarmashylyq bastamashy áielder ligasynyń» birlesken uiymdastyrýshysy jáne vitse-prezidenti boldy. Liga búginge deiin túrli salalarda áielderdi áleýmetik qoldaý jáne bilim jetildirý máselelerimen ainalysyp keledi.
2003 jyldan Aijan «Our Heritage» (Bizdiń mura) qoǵamdyq qorynyń prezidenti retinde qoǵamdyq qyzmetter atqardy. Qordyń negizgi mindeti - Qazaqstan qolónerin jańǵyrtý, saqtaý jáne damytý.
2005 jyly Aijan «Our Heritage» qoǵamdyq qorynyń atynan QR Mádeniet ministrligimen, UNESCO jáne Eýraziia qorymen birlesip, Shevron, KCell t.b. kompaniialardyń qarjylyq qoldaýymen «Qazaqstanda qolónerdi damytý jáne halyq kórkemóner kásipshiligin jańǵyrtý» taqyrybymen qolónerdi damytý jónindegi ulttyq baǵdarlamany ázirleý maqsatynda atalmysh baǵdarlamanyń Qazaqstandyq úilestirý keńesin qurdy. Qolónershilikti damytý jónindegi ulttyq baǵdarlama qurylǵannan keiin «Our Heritage» qory ony iske asyrýǵa kiristi. Astanada uiymdastyrylǵan qolónershilerdiń birinshi halyqaralyq konferentsiiasyna 150 delegat qatysty, olar úshin Qor biznes negizderi, marketing, Qazaqstannyń dástúrli qolóneri - zergerlik óner, kiiz, aǵash oiý, keste tigý, kilem toqý boiynsha Qazaqstannyń Óskemen, Qaraǵandy, Astana, Shymkent, Aqtóbe, Aqtaý, Almaty jáne t.b. qalalarynda oqytý seminarlaryn uiymdastyryp ótkizdi.
«Heritage» qory Aziia-Tynyq muhity aimaǵyndaǵy Dúniejúzilik qolóner keńesiniń qyzmetine de belsene atsalysty.
2008 jyly Keńeste Aijan Bekqulova vitse-prezident bolyp taǵaiyndaldy jáne elimizdiń ulttyq murasyn saqtaý, qolónerdi Qazaqstanda jáne odan tys jerlerde damytý jáne nasihattaý boiynsha jumysyn jalǵastyrdy.
2009 jyly Aijan Bekqulova «Sheber» qazaqstandyq sheberler festivaline bastamashy boldy. Baiqaý qolónershilerdiń sheberligin, qolóner buiymdarynyń sapasyn arttyrýǵa, umyt qalǵan tehnologiialar men qoldanbaly óner tehnikalarynyń assortimentin keńeitýge jáne jańǵyrtýǵa yqpal etti.
2012 jyly Aijan Bekqulova Qazaqstan Qolónershiler odaǵyn qurdy, ol qazir Qazaqstanda ǵana emes, elimizden tys jerlerde de eleýli mártebege ie qoǵamdyq uiym.
2013 jyldan bastap Aijan Bekqulova Qazaqstan qol qoiǵan Materialdyq emes mádeni mura týraly IýNESKO konventsiiasynyń aiasynda Materialdyq emes mádeni mura jónindegi Ulttyq komitettiń (MUK) múshesi jáne sarapshysy bolyp tabylady. Aijan kóp jyldar boiy Qazaqstanda jáne elden tys jerler - Frantsiiada, Germaniiada, AQSh-ta, Qytaida, Úndistanda jáne basqa da kóptegen elderde festival, kórme men konkýrstardyń kýratory jáne uiymdastyrýshysy retinde belsendi qyzmet atqaryp keledi. Qazirgi ýaqytta Aijan dástúrli jáne qazirgi zamanǵy sándik-qoldanbaly óner boiynsha sarapshy, Qazaqstannyń qolónershiligi boiynsha maqalalardyń uiymdastyrýshysy, spikeri, kýratory, jattyqtyrýshysy jáne avtory. Sondai-aq stýdentter men oqytýshylar, kásibi sheberler úshin Qazaqstan, Túrikmenstan, Qyrǵyzstan jáne basqa da elderde Qazaqstannyń qolóneri men ónerin tanymal etý maqsatynda kóptegen halyqaralyq konferentsiialarda, simpoziýmdarda, forýmdarda qyzmet atqarady.
