Qazaqstanda memlekettik qyzmetshilerdiń kásibi deńgeii men eńbek ónimdiligine erekshe mán berilmek. Bul týraly QR Prezidentiniń janyndaǵy memlekettik basqarý akademiiasynyń rektory Erlan Ábil málim etti, dep habarlaidy QazAqparat.
«Biyl akademiia aldynda 5 mindet tur. Birinshiden, KPI júiesin jetildirý arqyly memlekettik qyzmetshilerdiń kásibi deńgeii men eńbek ónimdiligin arttyrý. Iaǵni biyldan bastap akademiialyq, zertteý jáne ákimshilik máselelerdi óte ikemdi jáne tiimdi basqarýǵa múmkindik beretin uiymdyq qurylymdy ońtailandyrý jumysy qolǵa alyndy. Jedel jumysty arttyrý úshin rektorǵa tikelei baǵynatyn jeke qurylymdyq bólimsheler quryldy. Mysaly, quzyretterdi baǵalaý ortalyǵy jáne elektoraldy oqytý ortalyǵy. Qurylymdyq bólimshelerdiń erejeleri qaita qaralyp, biznes-protsester ońtailandyrylyp, akademiia qyzmetkerleriniń laýazymdyq nusqaýlyqtary naqtylanady», - dedi Erlan Ábil QR Memlekettik qyzmet isteri agenttiginiń keńeitilgen alqa otyrysynda.
Onyń aitýynsha, akademiia aldyndaǵy ekinshi mindet bilim berý protsesiniń tiimdiligin arttyrý. Óndiristen qol úzbei júrgiziletin bilim berý baǵdarlamalaryn iske asyrý.
«EARAA-da magistrlik baǵdarlamalardyń halyqaralyq akkreditteýden ótýdi, oqýǵa qabyldaý tásilderin jetildirýdi, sondai-aq úsh tilde sabaq berý sapasyn arttyrýdy qosa alǵanda, bilim berý qyzmetteriniń jelisin keńeitý arqyly qol jetkiziletin bolady. Pánderge arnalǵan tsifrlyq kontentti jáne iAcademy tsifrlyq platformasyn damytý boiynsha jumystar jalǵasatyn bolady. Úshinshiden, filialdar men jergilikti atqarýshy organdar, ortalyq memlekettik organdardyń aýmaqtyq bólimsheleri arasynda ózara tyǵyz qarym-qatynas ornatý jáne oqytý baǵdarlamalaryn ázirleý arqyly memlekettik qyzmetshilerdiń kásibi jáne tulǵalyq quzyretterin damytý», - deidi ol.
Odan bólek, akademiia rektory ǵylymi qyzmetkerler, oqytýshylar, doktoranttar men magistranttar qoldanbaly zertteýler institýtynyń jumysyna tartylatynyn aitty.
«Zertteýler memlekettik basqarý men memlekettik qyzmettiń problemalaryn, sondai-aq sybailas jemqorlyqqa qarsy saiasat pen etikany taldaýǵa baǵyttalatyn bolady. Sonymen qatar Global Think Tank Index álemdik reitingine kirý boiynsha jumys júrgiziledi. Jáne sońǵy mindet emlekettik organdardyń tiimdiligin arttyrýǵa járdemdesý jobalyq menedjment salasynda memlekettik qyzmetshilerdi sertifikattaý, biznes-protsesterdiń reinjiniringi boiynsha konsalting, assesment-ortalyqty ótkizý, sybailas jemqorlyqqa qarsy standartty engizý arqyly júzege asyrylady», - dedi E. Ábil.
