QR Memlekettik hatshysy Erlan Qarin Qazaqstandaǵy oqiǵalardy AQSh-taǵy tolqýlarmen salystyrdy, dep habarlaidy QazAqparat tilshisi.
«Biz kez kelgen ózge memleketke qarsy tutastyǵyn buzýǵa baǵyttalǵan barynsha turpaiy stsenarii qoldanýǵa bolatyn jańa kezeńge ótkenimizdi túsinýimiz kerek. Iaǵni, osy memleketti saqtap qala alamyz ba degen suraq turdy. Bir ǵana qalany qorǵaý máselesi bolǵan joq. Bir ýaqytta birneshe óńirde shabýyl jasaldy. Osy oqiǵalardyń negizgi quraly terroristik shabýyldar, terroristik toptardyń azamattyq nysandarǵa shabýyly boldy. Qazirgi tańda kontrterroristik operatsiia júrip jatyr», - dedi Memlekettik hatshy.
Onyń sózinshe, mundai operatsiianyń júrip jatqany týraly faktiniń ózi salmaqty ahýalǵa tap bolǵanymyzdy kórsetedi.
«Óitkeni memlekettiń áreketter algoritimi bar. Tártipsizdik jaǵdaiynda bir jospary bolady, tolqýlar jáne basqa da jaittar bolsa, basqa algoritm, jospar iske qosylady. Olardyń belgili bir kodtyq ataýy bolady degen siiaqty.
Qazir bizdiń elimizde tótenshe jaǵdaidan bólek terrorizmge qarsy oepratsiia rejimi engizilgen. Óitkeni biz terroristik qaterge tap keldik. Kóptegen elderde jýyqta bolǵan oqiǵalar bar. Mysaly AQSh-taǵy osyǵan uqsas Kapitolige jasalǵan shabýyldy aitýǵa bolady. Nemese Taiaý shyǵys elderindegi oqiǵalardy aitýǵa bolady. Osy oqiǵalardyń bárinde tek belgili bir element qana bolatyn. Ne syrtqy element, ne ishki element, ne aqparattyq, ne saiasi jáne taǵy sol siiaqty. Al qazir, osy oqiǵalardyń bárine syrt kóz retinde qarasaq, ahýaldy turaqsyzdandyrýdyń búkil arsenaly qoldanylǵanyn kóremiz. Maqsaty memlekettiń tutastyǵyn buzý bolǵan. Elimiz ol synaqqa qarsy tura bildi», - dedi Erlan Qarin.
