Qazir memlekettik apparat óz qyzmetin qaita qarap, kórsetkishter men indikatorlarǵa emes, nátijege jumys isteýdi úirenýi kerek.
Bul týraly Qoldanbaly etnosaiasi zertteýler institýtynyń direktory Talǵat Qaliev aitty, dep habarlaidy QazAqparat.
Ortalyq kommýnikatsiialar qyzmetinde Ulttyq qoǵamdyq senim keńesiniń músheleri Memleket basshysynyń Qazaqstan halqyna úndeýinde aitylǵan bastamalaryn talqylap jatyr.
«Shynynda da, qazir halyqtyń úlken úmiti paida bolǵanyn atap ótken jón. Jaǵdai toqtap qaldy, tipti narazylyq kóńil-kúi de toqtap qalǵandai, endi adamdar ári qarai ne bolatynyn kútip otyr. Óitkeni Prezident usynǵan sharalar – tolǵaǵy jetken óte ózekti máseleler. Biraq olardyń tabysty bolýyna ne yqpal etetini – bólek suraq. Shyn máninde olardy buǵan deiin statistikany manipýliatsiialaýmen ainalysqan, túrli bastamalardy sońyna jetkizbegen jáne jalǵan memlekettik baǵdarlamalardy júrgizgen memlekettik apparattyń ózi júzege asyrýy tiis. Qazir memlekettik apparat óz qyzmetin qaita qarap, kórsetkishter men indikatorlarǵa emes, nátijege jumys isteýdi úirenýi tiis. Taǵy bir másele – sol oligapoliianyń qarsylyǵy, ony ekonomikadan shyǵarý kerek», - dedi Talǵat Qaliev.
Onyń aitýynsha, barlyq osy máselelerde atalǵan protsesti baqylaýǵa qabiletti azamattyq sektor mańyzdy ról atqarady.
«Úshinshiden, Ulttyq keńeske erekshe ról beriledi, bul uiym óńirler boiynsha reidter uiymdastyryp, osy usynylǵan sharalardyń iske asyrylý protsesin baqylai alady. Biraq eń bastysy – bul sharalardaǵy halyqtyń orny. Eger halyq qoldasa jáne belsendi qatyssa, áleýmettik-ekonomikalyq túrlený sátti bolady. Al eger kútý pozitsiiasyn ustansa, bul jaǵdaida tipti eń gúldengen jáne progressivti bastamanyń ózi sátsizdikke ushyraýy múmkin. Sondyqtan bizdiń rólimiz – bir mezgilde túsindirýmen ainalysý jáne baqylaý, sonymen birge memlekettik apparatqa osy baǵdarlamalardyń barlyǵyn júzege asyrýǵa kómektesý», - dedi Talǵat Qaliev.
