Qazaqstan Respýblikasy Táýelsizdiginiń 30 jyldyǵyna orai Prezident Qasym-Jomart Toqaevtyń atyna shet memleketterdiń basshylary men halyqaralyq uiymdardyń jetekshilerinen quttyqtaý jedelhattary kelip túsip jatyr, - dep habarlaidy "Ult aqparat" Aqorda saityna silteme jasap.
Ońtústik Koreianyń Prezidenti Mýn Chje In korei halqynyń atynan júrekjardy quttyqtaýyn joldady.
"Elderimiz túrli sala boiynsha yntymaqtastyqty damytyp keledi. Atap aitqanda, bizdiń ózara almasqan saparlarymyz jáne general Hon Bom Donyń múrdesiniń tarihi otanyna qaitarylýy eki el arasyndaǵy strategiialyq seriktestiktiń odan ary tereńdeýine múmkindik berdi dep sanaimyn. Kelesi jyly memleketterimiz arasyndaǵy diplomatiialyq qatynastardyń 30 jyldyǵy atap ótiledi. Eki el arasyndaǵy kópjyldyq dostyq qatynastardy odan ary damytyp, halyqtarymyzdyń bailanystary men yqpaldastyǵyn tereńdete beremiz dep senemin", - delingen jedelhatta.
Singapýr Prezidenti Halima Iakýb óz quttyqtaýynda Qasym-Jomart Toqaev pen Qazaqstan halqyn Táýelsizdiktiń 30 jyldyǵymen quttyqtap, eki memleket arasynda tyǵyz yntymaqtastyqty jandandyrýǵa múmkindik bar ekenin atap ótken.
"Singapýr men Qazaqstan joǵary deńgeidegi berik ári jeke bailanystar arqyly bekemdelgen shynaiy dostyq qatynas ornatqan. Halyqaralyq saýdanyń negizgi tranzittik toraptary retinde eki eldiń ornalasqan strategiialyq ornyn eskere otyryp, júk tasymaly bailanystaryn damytýǵa ózara múddelimiz", - dep jazǵan Singapýr Prezidenti.
Armeniianyń Premer-ministri Nikol Pashinian da óziniń quttyqtaýy men igi tilekterin joldai otyryp, Qazaqstannyń saiasi jáne áleýmettik-ekonomikalyq salalardaǵy mańyzdy jetistikterin atap ótken.
"Bizdiń ózara kúsh-jigerimiz Armeniia men Qazaqstan arasyndaǵy tabysty yntymaqtastyqty ekijaqty formatta da, integratsiialyq qaýymdastyqtar men kópjaqty uiymdar aiasynda da odan ári damytýǵa baǵyttalatynyna senimdimin. Munyń bári eki el halyqtarynyń múddesin kózdeidi", - delingen jedelhatta.
Táýelsizdigimizdiń 30 jyldyǵyna orai Oman sultany Haisam Bin Tariq, Nepal prezidenti Bidhia Devi Bhandari, Avstraliianyń premer-ministri Skott Morrison, Izraildiń burynǵy premer-ministrleri Biniamin Netaniahý jáne Ehýd Olmert, BUU-nyń Jenevadaǵy bólimshesiniń bas direktory Tatiana Valovaia, Dúniejúzilik densaýlyq saqtaý uiymynyń bas direktory Tedros Adhanom Gebreiesýs, Resei Federatsiiasy Syrtqy barlaý qyzmetiniń direktory Sergei Naryshkin, "Mabetex Group" kompaniiasynyń prezidenti Afrim Pakolli jáne basqalar óz quttyqtaýlaryn joldady.
