Foto: Akorda.kz
Memleket basshysy Túrkiia Syrtqy ister ministri Hakan Fidandy qabyldady, - dep habarlaidy "Ult aqparat" Aqordanyń resmi saityna silteme jasap.
Prezident, eń aldymen, Hakan Fidandy Túrkiianyń Syrtqy ister ministri laýazymyna taǵaiyndalýymen quttyqtap, onyń qazaq-túrik qatynastaryn odan ári damytýǵa eleýli úles qosatynyna senim bildirdi.
Sonymen qatar Qasym-Jomart Toqaev biyl Túrkiia Respýblikasynyń qurylǵanyna 100 jyl tolatynyn atap ótip, bul baýyrlas memleket úshin tarihi beles ekenin jetkizdi.
– Bir ǵasyrdyń ishinde Anadoly saiasi, áleýmettik-ekonomikalyq jáne mádeni-gýmanitarlyq salada orasan zor tabysqa jetti. Aimaqtyq jáne jahandyq máselelerdi sheshýge belsendi jáne tabandy túrde atsalysyp, álemniń bedeldi memleketine ainaldy. Men Túrkiianyń ǵasyrlyq merekesine orai Astana kósheleriniń birin «Anadoly» dep ataýdy tapsyrdym, – dedi Qasym-Jomart Toqaev.
Memleket basshysy Túrkiia – bizdiń asa mańyzdy strategiialyq seriktesimiz ekenine nazar aýdaryp, eki el basshylarynyń kezdesýinde joǵary deńgeidegi kóptegen ýaǵdalastyqqa qol jetkizilgenin aitty.
– Baýyrlas elderimizdiń qarym-qatynasy keńeitilgen strategiialyq áriptestik deńgeiine kóterildi. Túrkiia elimizdiń negizgi tórt saýda seriktesiniń birine ainaldy. Byltyr ekijaqty taýar ainalymy 54 paiyzǵa ósip, 6,3 milliard dollarǵa jetti. Osy kórsetkishti jaqyn arada 10 milliardqa jetkizýge kelistik. Eki el arasynda investitsiialyq yntymaqtastyq qarqyndy damyp kele jatyr. Túrkiia – Qazaqstannyń eń iri 10 investorynyń biri. Qazir jalpy quny 2,8 milliard dollardan asatyn 36 joba boiynsha jumys júrip jatyr. Sondyqtan eki el arasyndaǵy yntymaqtastyqtyń bolashaǵy zor dep oilaimyz, – dedi Prezident.
Óz kezeginde Hakan Fidan Memleket basshysyna Prezident Rejep Taiip Erdoǵannyń sálemin jetkizip, Túrkiia tarapy ortaq kúsh-jigerdiń nátijesinde eki eldiń ózara yntymaqtastyǵyn, sondai-aq aimaqtyq jáne halyqaralyq arenadaǵy áleýetin budan da joǵary deńgeige jetkizýge nietti ekenin aitty.
Sonymen qatar ol Prezident Rejep Taiip Erdoǵannyń biyl qarasha aiynda ótetin Túrki memleketteri uiymynyń sammiti aiasynda ózara strategiialyq qarym-qatynas máselelerin keńinen talqylaýdy josparlap otyrǵanyn jetkizdi.
