Prezident Qasym-Jomart Toqaev Parlament Májilisiniń plenarlyq otyrysyna qatysty, dep habarlaidy "Ult aqparat" Aqordaǵa silteme jasap.
Plenarlyq otyrysqa deiin Memleket basshysy Parlament Májilisindegi saiasi partiialardyń fraktsiialary jetekshileriniń aldynda sóz sóilep, Qazaqstan Respýblikasy Premer-Ministri laýazymyna Álihan Smaiylovtyń kandidatýrasyn talqylaýǵa usyndy.
Fraktsiialar jetekshileri Álihan Smaiylovtyń kandidatýrasyna qoldaý bildirdi.
Budan keiin Qasym-Jomart Toqaev QR Konstitýtsiiasynyń 44 babyna sáikes Parlament Májilisiniń qaraýyna Qazaqstan Respýblikasynyń Premer-Ministri laýazymyna Smaiylov Álihan Ashanulynyń kandidatýrasyn usyndy.
– Qazaqstan Respýblikasy Premer-Ministri laýazymyna taǵaiyndaýǵa kelisim berý úshin Álihan Ashanuly Smaiylovtyń kandidatýrasyn Parlament Májilisiniń qaraýyna usynamyn. Ol tájiribeli maman, eńbekqor memlekettik qyzmetshi. Statistika jónindegi agenttiktiń tóraǵasy, Prezidenttiń kómekshisi, Qarjy ministri, Premer-Ministrdiń birinshi orynbasary boldy. Qazaqstan ekonomikasynyń bolashaǵy týraly kózqarasy durys. Naqty jospary bar. Álihan Ashanuly Úkimettiń jumysyn óte jaqsy biledi. Ózinde júktelgen mindetterdi abyroimen atqarady dep senemin, – dedi Prezident.
Saiasi partiialardyń fraktsiia jetekshileri, Parlament Májilisiniń depýtattary Álihan Smaiylovtyń kandidatýrasyna qoldaý bildirip, sóz sóiledi.
Talqylaýlardan keiin daýys berilip, Májilis Prezidenttiń Álihan Smaiylovty Úkimet basshysy laýazymyna taǵaiyndaý jónindegi usynysyna kelisim berdi.
Plenarlyq otyrysta Qasym-Jomart Toqaev Álihan Smaiylovty Premer-Ministr laýazymyna taǵaiyndaý týraly Jarlyqqa qol qoidy.
Prezident jańa Úkimetke saiasi, áleýmettik-ekonomikalyq salalardaǵy jáne ulttyq qaýipsizdik pen qorǵanysty qamatamasyz etý jónindegi ózekti máselelerdi sheshý úshin naqty mindetter júktedi.
Memleket basshysy sóziniń sońynda qaiǵyly kúnderi birlik tanytqan qazaqstandyqtarǵa shynaiy rizashylyǵyn bildirdi.
– Jýyq arada bolǵan qaiǵyly oqiǵalar kezindegi ekstremistermen kúreste azamattarymyzdyń kópshiligi patriottyq tanytty. Halyqtyń birligi, Qazaqstannyń táýelsizdigi men egemendi damýy ideiasyna degen shynaiy senimi – elimizdiń damýy men qoǵam bolyp uiysýynyń myqty irgetasy. Biz barlyq qiyndyqty birlese eńseremiz. Jańa Qazaqstandy birge quramyz, – dedi Qasym-Jomart Toqaev.
Memleket basshysynyń sóilegen sóziniń tolyq mátinin myna jerden oqi alasyzdar.
