Prezidenttiń baspasóz hatshysy Berik Ýáli Memleket basshysy Qasym-Jomart Toqaevtyń eldegi tótenshe jaǵdai rejimi kezinde qalai jumys istep jatqanyn aitty, dep habarlaidy QazAqparat.
«Prezidenttiń sheshimderi men úndeýleri boiynsha blogosferada ártúrli sipattaǵy túsindirmeler kóbeiip ketkeni ras. Osyǵan bailanysty arnaiy málimdeme jasaý qajet dep sanadym. Sebebi Qasym-Jomart Toqaev - memleketimizdegi eń joǵarǵy laýazymdy tulǵa jáne Qaýipsizdik keńesiniń Tóraǵasy. Sondyqtan Memleket basshysy derbes sheshim qabyldaidy. Konstitýtsiialyq qurylymǵa nuqsan keltirýdi kózdegen sodyrlardyń Qazaqstanǵa shabýyl jasaǵan qaiǵyly kúnderde de sondai sheshimder qabyldaǵan. Qasym-Jomart Kemeluly otandastarymyzǵa arnaǵan óziniń úndeýlerin keńesshileriniń kómeginsiz, ádettegidei ózi jazdy. Bastan-aiaq ózi redaktsiialady. Osy sátti paidalana otyryp, taǵy da aitqym keledi, Memleket basshysynyń jumysy týraly aqparatty taratyp, túsindirýge Prezidenttiń baspasóz hatshysynan basqa eshkimniń qatysy joq. Iaǵni, men ǵana bul týraly naqty, resmi aqparat tarata alamyn», - dedi Berik Ýáli «Habar 24» telearnasynyń efirinde.
Sondai-aq ol Prezidenttiń barsha jumysty Aqordada atqaryp otyrǵanyn atap ótti.
«Prezidentimiz Qasym-Jomart Kemeluly Toqaev Mańǵystaýda bastalyp, 4 qańtarda aýqymy keńeiip, sońy terrorlyq shabýylǵa ulasyp ketken sátten bastap, osy oqiǵalardyń bárin Aqordadan qadaǵalap, jumys istep otyr. Memleket basshysy kúni-túni «non-stop» rejiminde jumys istep, eldegi jaǵdaidy tolyq baqylaýda ustap otyr dep aitýǵa bolady. Ony ózderińiz de kórip, bilip otyrsyzdar», - dedi Prezidenttiń baspasóz hatshysy.
