Sýret: Aqorda
Memleket basshysy «Mass-media týraly» Qazaqstan Respýblikasynyń Zańyna qol qoidy, dep habarlaidy "Ult aqparat" Aqordanyń baspasóz qyzmetine silteme jasap.
Zań Memleket basshysynyń 2022 jylǵy 16 naýryzdaǵy «Jańa Qazaqstan: jańarý men jańǵyrý joly» atty Qazaqstan halqyna Joldaýynda memlekettiń múddelerin, qoǵamnyń suranystaryn jáne media salasynyń damý úrdisterin eskere otyryp, buqaralyq aqparat quraldary týraly zańdy qaita qaraý týraly bergen tapsyrmasyn oryndaý maqsatynda ázirlendi.
Jańa Zańǵa «Buqaralyq aqparat quraldary týraly» jáne «Teleradio habarlaryn taratý týraly» zańdardyń negizgi erejeleri endi. Atalǵan zańdar aldaǵy ýaqytta kúshin joiady. Jańa zańda birqatar tyń erejeler qarastyrylǵan. Atap aitqanda, buqaralyq aqparat quraldarymen qatar, internet-resýrstardy da qamtityn «mass-media» degen jańa ári anaǵurlym keń uǵym engizildi.
Memlekettik aqparattyq saiasat júzege asyrylatyn Biryńǵai media platforma qurý kózdelgen. Onyń ishinde memlekettik emes buqaralyq aqparat quraldaryna granttar berý, akkreditteýdiń ońailatylǵan tártibi arqyly (akkreditatsiia kartalaryn berýdiń avtomattandyrylǵan protsesi) jýrnalisterdi memlekettik organdar men uiymdarǵa tirkeý jáne basqa da mindetter qarastyrylǵan.
Jýrnalister úshin qosymsha quqyqtyq kepildikter belgilengen. «Jýrnalistiń erekshe mártebesi» degen uǵym engizildi. Iaǵni, jýrnalistiń quqyqtary men bostandyqtarynyń qorǵalýyn, olardyń aqparat izdeý, suratý, alý jáne taratý kezindegi, sondai-aq «Mass-media týraly» Zańda belgilengen ózge de erekshe quqyqtaryn jýrnalist mártebesi dep túsiný kerek. Shyndyqqa sáikes kelmeitin jáne azamattardyń ar-namysyna, qadir-qasietine jáne iskerlik bedeline nuqsan keltiretin málimetterdi teriske shyǵarý týraly BAQ-qa talap qoiý merzimi buqaralyq aqparat quraldarynda málimetter jariialanǵan kúnnen bastap 1 jyl dep belgilengen.
Sheteldik buqaralyq aqparat quraldarynyń ókildikteri men olardyń jýrnalisterin akkreditteý tártibi jetildirildi. BAQ-tyń suratýlaryn qaraý merzimi 7-den 5 jumys kúnine deiin qysqartyldy. Bul jýrnalisterge qajetti aqparatty qysqa merzimde alýǵa múmkindik beredi. Osylaisha aqparattyń ózektiligi saqtalady.
BAQ-tyń óz qyzmetin ózi retteý maqsatynda Zańda qoǵamdyq-kásiptik keńester qurý kózdelgen. Keńester respýblikalyq jáne óńirlik deńgeilerde qurylýy múmkin. Bul keńesterdiń negizgi qyzmeti – Jýrnalisterdiń ádep kodeksin ázirleý. Granttyq qarjylandyrýdy engizý arqyly memlekettik aqparattyq saiasatty qarjylandyrý tetikteri jetildirildi.
Ulttyq tele-radio habarlaryn taratý múddesin qorǵaý maqsatynda memlekettik tildegi otandyq tele-radio baǵdarlamalardyń apta saiynǵy kólemi 50 paiyzdan 60 paiyzǵa deiin ulǵaityldy.
Otandyq tele-radio arnalarda sheteldik tele-radio baǵdarlamalaryn retransliatsiialaý kólemi 20 paiyzdan 10 paiyzǵa deiin tómendetildi. Óz-ózine qol jumsaýdy nasihattaityn aqparatty, ózin-ózi óltirýdiń joldary men oǵan úndeitin aqparatty taratýǵa jáne (nemese) jariialaýǵa tyiym salynady.
Zańnyń mátini baspasózde jariialanady.
