Qazaqstan Prezidenti – Qarýly Kúshterdiń Joǵarǵy Bas qolbasshysy Qasym-Jomart Toqaev Qorǵanys ministriniń Qazaqstan áskeriniń qazirgi ahýaly men damý perspektivalary týraly esebin tyńdady, dep habarlaidy "Ult aqparat".
Nurlan Ermekbaev Memleket basshysyna Arys qalasyndaǵy tótenshe jaǵdaidyń saldaryn joiý týraly baiandady. Áskeri vedomstvo basshysynyń aitýynsha, elimizdegi barlyq oq-dári qoimalaryna tekserý júrgizilgen. Nátijesinde atalǵan nysandardy qajetti qaýipsizdik deńgeiine jetkizý jáne ońtailandyrý jospary daiyndalǵan.
Qorǵanys ministri vedomstvonyń ortalyq apparatynyń qyzmetine fýnktsionaldy taldaý júrgizýdiń birinshi kezeńi týraly esep berdi. Onyń aitýynsha, atqarylǵan jumystardyń nátijesinde ministrliktiń, bas shtabtyń jáne áskeri basqarmanyń jergilikti organdarynyń 300-den asa shtattyq birligi ońtailandyryldy. Sonyń esebinen 2020 jyldan bastap jyl saiynǵy únem 450 million teńgeden asatyn bolady. Bul qarjy áskeri quramdy materialdyq turǵydan yntalandyrýǵa baǵyttalady.
Sonymen qatar Nurlan Ermekbaev Qasym-Jomart Toqaevqa kezekti ásker qataryna shaqyrý naýqanynyń qorytyndylary, qysqy oqytý maýsymyna daiyndyq jáne áskeri tehnikalardy qysqy rejimge kóshirý jóninde málimet berdi. Budan bólek áýe qorǵanysy men áskeri-teńiz kúshterin damytý, Uly Otan soǵysyndaǵy Jeńistiń 75 jyldyǵyna arnalǵan áskeri sherýge daiyndyq, sondai-aq, áskeri qyzmetshilerdi áleýmettik turǵydan qorǵaý máseleleri qozǵaldy.
Kezdesý sońynda Qasym-Jomart Toqaev elimizdiń Qarýly Kúshterin qazirgi zaman talabyna sai jasaqtaýǵa qatysty birqatar naqty tapsyrma berdi.
