Táýelsizdik jyldarynda bir jarym million azamatymyzdyń turǵyn-úi jaǵdaiy jaqsardy. Bul týraly Táýelsizdiktiń 30 jyldyǵyna arnalǵan saltanatty is-sharada QR Prezidenti Qasym-Jomart Toqaev aitty, dep habarlaidy QazAqparat.
«Aýqymdy reformalardyń arqasynda otandyq ekonomika kólemi shynaiy mánde 2,5 ese artty. Jalpy ishki ónim dollarmen jan basyna shaqqanda 13 eseden astamǵa ósti jáne elimizdiń Ortalyq Aziiadaǵy sózsiz kópbasshylyǵyn qamtamasyz etti», - dep atap ótti QR Prezidenti.
Memleket basshysynyń atap ótýinshe, Qazaqstanǵa 370 mlrd dollardan astam tikelei shetel investitsiiasy tartyldy. Jan basyna shaqqandaǵy bul kórsetkish boiynsha elimiz postkeńestik keńistiktegi memleketterdiń bárinen jáne birqatar shyǵyseýropalyq elderden basyp ozdy. Qazaqstannyń halyqaralyq qory 90 mlrd dollardan asyp jyǵylady.
«Elimiz óńirlerdi, kólik infraqurylymyn, áleýmettik salalardy damytýda baiypty jetistikterge jetti. 13 myń shaqyrym avtomobil joly men 2,5 myń temir jol salynyp, jańǵyrtyldy. «Batys Qytai – Batys Eýropa» kúre jolynyń elimizdegi bóligi iske qosyldy. Kaspii teńiziniń jaǵasynda Quryq ailaǵy ashyldy. Óndiris salasyna serpin berildi. Aýmaǵy 180 mln sharshy metrden astam úi salyndy. Sonyń nátijesinde bir jarym million azamatymyzdyń turǵyn-úi jaǵdaiy jaqsardy», - dep atap ótti Qasym-Jomart Toqaev.
