Memleket basshysy Qasym-Jomart Toqaevtyń tóraǵalyǵymen Almaty qalasyn damytý máseleleri jónindegi keńes bastaldy. Bul týraly "Ult aqparat" QR Prezidentiniń baspasóz hatshysy Berik Ýálige silteme jasap habarlaidy.
«Almaty – Táýelsiz Qazaqstannyń irgesi qalanǵan qasterli meken. Bárimiz úshin bul shahardyń orny bólek. Munda el taǵdyryna qatysty mańyzdy ári tarihi sheshimder qabyldandy. Ata zańymyz, memlekettik rámizder, ulttyq valiýtamyz osynda bekitildi. Búginde Almaty bilim, ǵylym, mádeniet jáne iskerlik ortalyǵy retinde damyp keledi. Sońǵy jyldary qalaǵa jańa aýmaqtar qosylyp, kólemi 2 esege ulǵaidy. Halqynyń sany 20 paiyzǵa ósip, bir million segiz júz myń adamǵa jetti. Qalada basqa óńirlerden kelgen jáne osy tóńirekte turatyn jarty millionǵa jýyq adam jumyspen qamtylyp otyr», - dedi QR Prezidenti.
Sondai-aq, Prezident búginde dúniejúzindegi 600 qalalyq aglomeratsiia álemdik ishki jalpy ónimniń úshten ekisin óndirip otyrǵandyǵyn jetkizdi.
«Bizdiń shaharlarymyz da ulttyq ekonomikany damytýǵa zor úles qosyp keledi. Búgingi tańda elimizdiń ishki jalpy óniminiń úshten biri Almaty jáne Nur-Sultan qalalaryna tiesili. Almaty táýelsizdik jyldary iri ekonomikalyq ortalyqqa jáne respýblikalyq biýdjettiń donoryna ainaldy. Shahar ishki jalpy ónimniń besten birin, memlekettik biýdjetke túsetin túsimniń 20 paiyzdan astamyn jáne bankter beretin nesieniń 60 paiyzyn qamtamasyz etip otyr. Sondai-aq, elimizdegi kóterme jáne bólshek saýdanyń 40 paiyzdan astamy, syrtqy saýda ainalymynyń 15 paiyzǵa jýyǵy osy qalada júrgiziledi», - dedi Q. Toqaev.
QR Prezidenti qala investorlar úshin qolaily iri óńirlik ortalyqqa ainalǵany týraly da aitty.
«Qazir Almatyda bankterdiń, halyqaralyq uiymdar men transulttyq kompaniialardyń bas keńseleri ornalasqan. Osynda ashylǵan Birikken Ulttar Uiymynyń 17 mekemesiniń ókildikteri Ortalyq Aziianyń óńirlik habyna ainalyp otyr. Qalanyń ekonomikalyq, áleýmettik, ekologiialyq máselelerine qatysty aýqymdy jumys júrgizildi. Aldaǵy ýaqytta bul bastamalar jalǵasyn tabýy tiis», - dedi ol.
