Memleket basshysy Ekibastuzdaǵy temirjol klasterimen tanysty. Aldymen «Prommashkomplekt» temirjol dóńgelekterin shyǵaratyn zaýyttyń jumysymen tanysty, dep habarlaidy Aqordanyń resmi saity.
Memleket basshysyna óndiris barysy kórsetilip, jumysshylardy áleýmettik qoldaý sharalary, kásiporynnyń eksporttyq áleýeti men odan ári jańǵyrtý jospar týraly málimet berildi.
2012 jyly salynǵan zaýyt 700-den 1250 mm-ge deiingi ártúrli diametrli jáne diskili konstrýktsiiadaǵy temirjol dóńgelekterin shyǵarady. Zaýyt jylyna 300 myń dana ónim shyǵarady. Kompaniiada 750-ge jýyq adam jumys isteidi.
Budan keiin Prezident serpindi klemmalar men burandalar shyǵaratyn «Ferrotranstreid» zaýytyn iske qosty.
– Búginde Ekibastuz elimizdiń temirjol mashina jasaý ortalyǵyna ainaldy. Qala kásiporyndary ónerkásip óniminiń 73 paiyzyn quraidy. Olar jyl saiyn temirjol salasyna qajetti 85 milliard teńgeniń ónimin shyǵarady. Onyń 70 paiyzy eksporttalady. Búgin TMD elderinde balamasy joq «Ferrotranstreid» zaýyty iske qosyldy. Bul jerden halyqaralyq sapa standarttaryna sáikes keletin komponentterdi shyǵarady. Jańa óndiris tolyq kúshine engennen keiin «Qazaqstan temir joly» ulttyq kompaniiasy terminaldar men burandalardy importamaityn bolady. Kásiporyn otandyq mashina jasaý salasynyń básekege qabilettiligin arttyratynyna senimdimin, – dedi Qasym-Jomart Toqaev.
Memleket basshysy kásiporynnyń ónimderinen jasalǵan kórmeni aralap, zaýyttyń eńbek ujymymen kezdesti. Bul jerde 160 adam jumys isteidi. Zaýyt jylyna rels bekitetin 3 mln. jinaq jáne 4,5 mln. dana polimerli tóseý quralyn shyǵarady.
Prezidentke temir jol salasyndaǵy ónerkásiptiń jetistikteri men perspektivalary týraly aqparat berilip, beinerolik kórsetildi.
Bul kásiporyndar temir jol salasyndaǵy elimizdiń shikizattyq emes eksportynyń úlesin aitarlyqtai arttyrýǵa múmkindik beredi.
