QR Prezidenti Nursultan Nazarbaev Astanadaǵy jańajyldyq qaiyrymdylyq balyna qatysty, dep habarlaidy "Ult aqparat" Aqordanyń baspasóz qyzmetine silteme jasap.
Elbasy keshke qatysýshylarǵa arnaǵan sózinde Jańa jyl merekesi árdaiym kóterińki kóńil-kúi men baqytty bolashaqqa degen úmit syilaitynyn atap ótti.
- Ótip bara jatqan jyl jarqyn jáne aýqymdy oqiǵalarymen este qalady. Qysqy Ýniversiada men halyqaralyq «EKSPO-2017» kórmesi qazaqstandyqtarǵa jáne sheteldik qonaqtarǵa sport pen tehnologiianyń tamasha merekesin tartý etti. Biz Islam yntymaqtastyǵy uiymynyń sammitin joǵary deńgeide ótkizdik, - dedi Qazaqstan Prezidenti.
Memleket basshysy BUU Qaýipsizdik Keńesinde elimizdiń beibit bastamalaryn ilgeriletý máselelerine jáne aldaǵy jyly Qazaqstannyń osy halyqaralyq uiymǵa tóraǵalyq etýiniń perspektivalaryna erekshe toqtaldy.
- Bul - álemniń eki júzge jýyq eliniń jas memleketke bildirgen airyqsha senimi. Kelesi jyly Qazaqstanda álemdik jáne dástúrli dinder kóshbasshylarynyń sezi, Aziiadaǵy ózara yqpaldastyq jáne senim sharalary jónindegi keńes, sondai-aq basqa da kóptegen mańyzdy is-sharalar ótedi. Bul jeńisterdiń barlyǵy - árqaisymyzdyń kúsh-jigerimiz ben qajyrly eńbegimizdiń nátijesi. Árbir azamatymyz Qazaqstannyń jetistikterine qatysy bar ekenin sezingeni mańyzdy, - dedi Memleket basshysy.
Sońynda Nursultan Nazarbaev keshke qatysýshylardy kele jatqan jańa 2018 jylmen quttyqtap, barsha qazaqstandyqtarǵa zor densaýlyq, qýanysh pen shattyq tiledi.
- Bárimizdiń úiimiz meiirim shýaǵyna bólenip, baq-berekege toly bolsyn! - dedi Qazaqstan Prezidenti.
Jańajyldyq baldy ótkizýden túsken qarajat qaiyrymdylyq maqsatqa baǵyttalatyn bolady.
