Kez kelgen synaqqa tótep berý úshin birligimiz árdaiym bekem bolýǵa tiis. Bul týraly Qazaqstan halqy Assambleiasynyń HHIH sessiiasynda QR Prezidenti Qasym-Jomart Toqaev aitty, dep habarlaidy QazAqparat .
«Assambleiany basqarý óte jaýapty jumys. Bul - úlken saiasat. Sondyqtan osy jaýapty mindetti jaýapkershilikpen atqaramyn dep aitqym keledi. Qadirli Nursultan Ábishuly, Siz Táýelsizdigimizdi nyǵaityp, Qazaqstandy damyǵan elder qataryna qosý úshin eń aldymen aýyzbirshilik, tatýlyq asa qajet ekenin únemi aityp kelesiz. Bul kóne zamannan kele jatqan aqiqat. Qazirgi urpaqqa da qajetti qundylyq. Tabysty reformalarymyzdyń myzǵymas tuǵyry – halqymyzdyń birligi. Al elimizdiń biregeiligi - áralýan ult pen ulystyń jarasymdy tatýlyǵy. Siz «Qazaqstan joly» tujyrymdamasyn kúlli álemge pash ettińiz. Qazirgi tańda memleketimizdiń dara jolyn dúnie júzi moiyndaidy jáne joǵary baǵalaidy. Jahan jurtshylyǵy Sizdi asa kórnekti reformator jáne álem deńgeiindegi saiasatker retinde qurmetteidi. Parasatty basshylyǵyńyzben qol jetkizilgen tabystarymyz máńgilik tarihi mán-mańyzǵa ie boldy. Sondyqtan eldiń jolynda sińirgen eren eńbegińiz álemniń jáne Qazaqstannyń tarihynda máńgi jazylatyndyǵy sózsiz. Halqymyzdyń tatý-tátti tirshiligi Sizdiń saliqaly saiasatyńyzdyń arqasy. Osy dástúrdi saqtap, elimizde odan ary órkendetý qashanda mańyzdy. Osyǵan orai memlekettik saiasattyń sabaqtastyǵy airyqsha mańyzǵa ie. Bul Qazaqstannyń bolashaǵy úshin kerek ekeni aidan anyq», - dedi QR Prezidenti.
Memleket basshysy Assambleia buryn-sońdy esh elde bolmaǵan biregei qurylym ekendigin, basqa elder de bizdiń úlgimiz boiynsha túrli ult ókilderiniń basyn qosatyn osyndai uiym qurýdy bastaǵanyn atap ótti.
«Búkil qoǵamdy uiystyryp, yrys-yntymaǵymyzdy arttyrý asa ózekti másele. Biz árqashan «bereke basy birlikte» degen qasterlik qaǵidany ustandyq. Qazaqstan 30 jyldyń ishinde halqy tatý, jeri tynysh, qoǵamy turaqty memleketke ainaldy. Bul shyn máninde maqtan tutarlyq jetistik. Santúrli ulttyń basyn biriktirip, bir maqsatqa jumyldyrý ońai sharýa emes. Bul tabandylyqty talap etetin kúrdeli jumys. Biz syilastyq pen kelisimniń, baýyrmalyq pen ózara qurmettiń negizinde eńseli, órkenietti el bolyp otyrmyz. Bul árine, Elbasynyń arqasy. Muny árdaiym este ustaýymyz kerek. Ásirese, koronavirýs derti qyspaqqa alǵan kúrdeli kezeńde halqymyzdyń aldynda turǵan mindetterdi júzege asyrý úshin biz bárimiz bir el, bir ult bolyp jumylýymyz kerek. Assambleianyń da aldynda jańa mindetter tur. Tatýlyq pen kelisim saiasatyn jalǵastyryp, damyta túsý barshamyzdyń ortaq paryzymyz. Sebebi búgindei almaǵaiyp zamanda kez kelgen synaqqa tótep berý úshin birligimiz árdaiym bekem bolýǵa tiis»,- dedi Qasym-Jomart Toqaev.
