Foto: qazaquni.kz
Memleket basshysy ǵalym, qoǵam qairatkeri Amangeldi Aitalynyń otbasy men jaqyn týystaryna kóńil aitý jedelhatyn joldady, - dep habarlaidy "Ult aqparat" Aqordanyń baspasóz qyzmetine silteme jasap.
Qazaqstan Prezidenti asa kórnekti ǵalym, qoǵam qairatkeri, Qazaqstan Respýblikasy Parlamenti Májilisiniń II jáne III shaqyrylymdarynyń depýtaty Amangeldi Aitalynyń dúnieden ótýine bailanysty onyń otbasy men jaqyn týystaryna kóńil aitty.
"Amangeldi Ábdirahmanuly uzaq jyldar boiy bilim jáne ǵylym salasynda jemisti jumys istedi. Sonyń ishinde Aqtóbe memlekettik pedagogikalyq institýtynda joǵary bilikti mamandar daiarlaý isine mol eńbek sińirdi. Májilis depýtaty bolǵan kezinde otandyq zańnamany jetildirýge jáne parlamentarizmdi damytýǵa atsalysty. Qajyrly qyzmetimen elimizdiń órkendep damýyna óz úlesin qosyp, sońyna jarqyn iz qaldyrǵan Amangeldi Ábdirahmanulynyń esimi men beinesi umytylmaidy. Marqumnyń imany salamat, jany jánnatta bolsyn", - dep jazylǵan jedelhatta.
