Búgin QR Prezidenti Qasym-Jomart Toqaev Buqaralyq aqparat quraldary qyzmetkerleriniń kúnimen quttyqtady. Onda Memleket basshysy 1 qazandy Radio qyzmetkerleri kúni dep resmi bekitýdi usyndy.
Quttyqtaýda Prezident aqparat salasyn damytýǵa memleket tarapynan qashanda erekshe kóńil bólinetinin, óz kásibiniń maitalmany bolǵan qarymdy jýrnalisterge qoldaý kórsetiletinin atap ótken. Sondai-aq, Memleket basshysy biyl dástúrli Prezident syilyǵy osymen jiyrma besinshi ret tabystalyp otyrǵanyn aityp: «Bul syilyqqa qasterli Táýelsizdigimizdiń 30 jyldyǵy qarsańynda ie bolýdyń da simvoldyq máni bar. Sizder egemendik jyldarynda urpaqtyń boiyna azattyq rýhyn sińirýge zor úles qostyńyzdar. Men memleket pen qoǵamnyń ortasynda altyn kópir bolyp júrgen jýrnalisterdiń eńbegin joǵary baǵalaimyn» deidi.
«Sońǵy kezde radio qyzmetkerleriniń kásibi merekesi joq ekeni jii aitylyp júr. Men Qazaq radiosynyń 100 jyldyǵy aiasynda 1 qazandy Radio qyzmetkerleri kúni dep resmi túrde bekitken jón dep sanaimyn. Elimiz berekeli birlik pen yrysty yntymaqtyń arqasynda ósip-órkendei tússin! Jýrnalister jaǵymdy jańalyǵymen jurtshylyqty qýanta bersin! Barshańyzǵa shyǵarmashylyq shabyt, tolaǵai tabys tileimin!», - dep túiindeidi QR Prezidenti.
