QR Sybailas jemqorlyqqa qarsy is-qimyl agenttiginiń seriktestik departamentiniń bas sarapshysy Symbat Israpýlova memlekettik qyzmetshilerdiń zańdy buzyp syilyqtardy alý faktilerin anyqtaý boiynsha qoǵamdyq monitoring júrgizilip jatqanyn málim etti, dep habarlaidy "Ult aqparat".
«Memlekettik qyzmetshilerge qyzmettik mindetterin oryndaǵany úshin kez kelgen sipatta syilyq usynýǵa tyiym salynady. Eger syilyqtyń quny 2 AEK-ten (5 050 teńge) tómen bolsa, syilyq usynýshyǵa 200 AEK (505 000 teńge) mólsherinde ákimshilik aiyppul salynady. Bul jaǵdaida syilyqty qabyldap alǵan memqyzmetshige 600 AEK (1,5 mln teńgeden astam) aiyppul kózdelgen. Al, bul somadan joǵary kórsetkishterdiń bári para dep sanalyp, qylmystyq jaýapkershilikke ákeledi», - dedi Symbat Israpýlova agenttikte ótken baspasóz máslihatynda.
Memlekettik qyzmetshiniń ózi bilmei kelip túsken, sondai-aq ol tiisti fýnktsiialaryn atqarýyna bailanysty alǵan syilyqtar jeti kún merzimde arnaýly memlekettik qorǵa tapsyrylýy tiis.
«Bul úshin jergilikti jerdegi memlekettik qyzmetshiler memlekettik múlik jáne jekeshelendirý departamentine júginýi qajet. Shyndyǵyna kelsek, memlekettik qyzmetshilerge 2 myń teńge nemese kámpit qorabyn usynyp, 200 ese artyq aiyppul tóleýge týra keletin mánsiz «alǵystardyń» saldaryn bilý kerek. Aldaǵy merekeler qarsańynda barlyq memlekettik qyzmetshilerge baǵynyshtylardan jáne basqa da adamdardan syilyqtar alý, bul – ádep pen sybailas jemqorlyqqa qarsy zańnamany óreskel buzý ekenin eske salamyz», - dedi ol.
