Foto: primeminister.kz
Premer-Ministr Álihan Smaiylov Úkimet otyrysy barysynda mektepterde qaýipsizdikti arttyrý sharalaryn pysyqtaýdy tapsyrdy, dep habarlaidy "Ult aqparat" primeminister.kz saityna silteme jasap.
Ishki ister ministriniń birinshi orynbasary Marat Qojaevtyń aitýynsha, 13 aqpanda tańerteń Petropavl qalasynyń politsiia basqarmasyna №4 orta mekteptiń oqýshylaryna dene jaraqatyn keltirý týraly habarlama túsken. Oqiǵa bolǵan orynǵa jedel-tergeý toby attanǵan.
Tekserý barysynda kúdikti (9 synyp oqýshysy) 2-shi qabatta ornalasqan ájethanada maskasyn kiip, baltamen dálizge júgirip shyǵyp, úsh oqýshyǵa shabýyldaǵan. Shabýyl jasaǵan oqýshyny joǵary synyp oqýshylary men muǵalimder ustaǵan.
Qazirgi kezde 2 jábirlenýshi qalalyq emhananyń statsionarynda jatyr, jaǵdailary birqalypty. Bir oqýshy meditsinalyq kómek kórsetilgennen keiin úiine qaitarylǵan.
Atalǵan fakti boiynsha Qylmystyq kodekstiń 24-baby 3-bóligi, 99-baby 2-bóligi boiynsha qylmystyq is qozǵalyp, kúdikti ýaqytsha ustaý izoliatoryna qamaldy.
Esepti tyńdaǵan Álihan Smaiylov Petropavlda oryn alǵan oqys jaǵdai halyq arasynda úlken alańdaýshylyq týdyrǵanyn atap ótti.
«Balalarynyń qaýipsizdigine alańdamaityn otbasy joq. Mekteptiń ishinde de qaýiptiń baryn kórip otyrmyz. Sondyqtan bul máseleni qaita qarap, oqý oryndaryna tekserý júrgizý qajet. Beinekameralardyń sanyn kóbeitip, mektepke kireberis jerlerde baqylaýdy kúsheitý máselesin qaraý kerek», — dedi Premer-Ministr.
Bul rette Úkimet basshysy Ishki ister ministrligine balalardyń qaýipsizdigin arttyrý boiynsha kelisilgen usynystar engizýdi, Densaýlyq saqtaý ministrligine zardap shekken balalardy emdeýdi erekshe baqylaýǵa alýdy, Oqý-aǵartý ministrligine Ishki ister jáne Tótenshe jaǵdailar ministrlikterimen birlesip, qaýipsizdik sabaqtaryn ázirleýdi tapsyrdy.
