Mektepterge keibir pánderdi qashyqtyq formatta ótkizýge ruqsat beriledi. Bul týraly QR Bilim jáne ǵylym vitse-ministri Sholpan Karinova málim etti, dep habarlaidy QazAqparat.
«Jańa oqý jylyn qatań sanitarlyq-epidemiologiialyq talaptardy saqtai otyryp, shtattyq formatta bastaý josparlanýda. Búgingi kúni mektepke deiingi uiymdar shtattyq jumys rejimine oraldy. Osy oqý jylynda 7 myńnan astam mektep shamamen 3,6 mln oqýshyny, onyń ishinde 380 myńǵa jýyq birinshi synyp oqýshysyn qabyldaidy. Shtattyq rejimde oqýdy bastaý úshin Bilim jáne ǵylym ministrligi mektepter júktemesine úlken taldaý júrgizdi. Ulttyq bilim berý derekter qorynyń derekteri boiynsha mektepterdiń 95 paiyzynyń jobalyq qýaty men oqýshylar sany barlyq sanitariialyq talaptardy saqtai otyryp, oqýdy tolyq shtattyq formatta bastaýǵa múmkindik beredi. Mundai mektepterde oqýshylardyń 81 paiyzy bilim alady», - dedi ol Ortalyq kommýnikatsiialar qyzmetindegi baspasóz máslihaty barysynda.
Sonymen qatar vitse-ministrdiń atap ótýinshe, mektepterge keibir pánderdi qashyqtyq formatta ótkizýge ruqsat beriledi.
«Oqýshy oryndarynyń tapshylyǵy, 3 aýysymdylyǵy bar 300-den asa mektep bar. Bul jalpy mektepterdiń 5 paiyzyn quraidy. Mundai mektepterde oqýshylardyń 19 paiyzy bilim alady dep josparlanyp otyr. Osy mektepter qosymsha is-sharalar arqyly, onyń ishinde keibir pánderdi qashyqtan oqyta otyryp, oqý ikemdi keste boiynsha shtattyq túrde júrgiziledi. Aýysymdar men kishi aýysymdar uiymdastyrylady. Negizgi pánder bul mektepterde shtattyq formatta oqytylady. Búgingi kúni Bas memlekettik sanitar dárigerdiń qaýlysy qabyldandy. Bailanysta bolǵan balalar úshin oqshaýlaý kezeńine sinhrondy qashyqtan oqytý uiymdastyrylady. Ata-analardyń ótinishteri negizinde sozylmaly naýqastary bar balalarǵa meditsinalyq uiym anyqtamalary negizinde asinhrondy qashyqtyqtan oqytý usynylady. Bul oqýshylar oqýlyqtarmen, oqytý kontenti bar aqparattyq júiemen, elektrondyq jýrnalmen qamtylady. Jiyntyq baqylaý jumystaryn olar mektepte tapsyrady. Sabaqtardyń uzaqtyǵy 45 minýtty quraidy», - dedi Sholpan Karinova.
