Biyl 11-synyp oqýshylary Qazaqstan tarihy páninen emtihandy aýyzsha formatta tapsyrady. Bul týraly QR bilim jáne ǵylymi vitse-ministri Sholpan Karinova málim etti, dep habarlaidy QazAqparat.
«Jyldaǵy dástúrge sáikes biyl da mektep túlekteri 5 pánnen emtihan tapsyrady. Emtihan pánderi jáne tapsyrmalardyń mazmunyna qatysty eshqandai ózgeris joq. Barlyǵy da mektep baǵdarlamasy aiasynda. Biyl mektep túlekteri Qazaqstan tarihynan emtihandy aýyzsha tapsyrady. Bul másele sońǵy jyldary jii talqylanyp keledi. Tarih páni muǵalimderi úshin bul jańashyldyq emes», - dedi Sholpan Karinova ministrlikte ótken tikelei efir barysynda.
Vitse-ministrdiń málimdeýinshe, Qazaqstan tarihy páninen emtihandy aýyzsha tapsyrýǵa qatysty ministrlikke birneshe ret usynys kelip túsken.
«Iaǵni emtihannyń formaty ǵana ózgerip otyr. Aýyzsha, jazbasha, test bolsyn emtihan tapsyrmalary oqý baǵdarlamasynyń aiasynda ázirlenedi. Syrttan, qosymsha tapsyrma bolmaidy. Onyń ústine Qazaqstan tarihy páninen emtihandy aýyzsha, iaǵni bilet arqyly tapsyrý buǵan deiin bar tájiribe», - deidi ol.
