Mektep oqýshylaryn koronavirýsqa qarsy vaktsinatsiialaý júrgizilip jatqan joq. Bul týraly QR DSM Qoǵamdyq densaýlyq saqtaý ulttyq ortalyǵynyń basqarma tóraǵasynyń orynbasary Ainagúl Qýatbaeva aitty, dep habarlaidy QazAqparat.
Búgin Ortalyq kommýnikatsiialar qyzmetinde ótken baspasóz máslihatyna qatysqan Densaýlyq saqtaý ministrliginiń ókilderine: «Áleýmettik jelide balalardy mektepke vaktsina salý úshin shaqyryp jatyr. Sondyqtan balalaryńyzdy mektepke jibermeńizder» degen maǵynada habarlama júrgendigi aitylyp, munyń qanshalyqty ras ekendigi suralǵan bolatyn.
«Áleýmettik jelide mundai aqparat tarap otyr. Halyq arasynda ártúrli sózge ilanyp, bizge habarlasyp jatqan ata-analar da bar. Eń aldymen biriktirilgen, bir qutyda, bir shpritste koronavirýs juqpasyna jáne tumaýǵa qarsy vaktsinany eshkim oilap tapqan joq. Ondai vaktsina múldem óndirilmegen. Mundai vaktsina oilap tabylatyn bolsa, onda bul árine meditsina salasyndaǵy sensatsiia bolar edi», - dedi ol.
Onyń atap ótýinshe, elimizde 18 jasqa deiingi balalarǵa vaktsinatsiia olardyń ata-anasynyń kelisimen ǵana salynady.
«Osyǵan orai, mektep aiasynda qandai da bir vaktsina salynatyn bolsa, onda ata-analar jinalysy ótkiziledi. Búginde mektepterge vaktsinatsiia júrgizilip jatqan joq», - dedi Ainagúl Qýatbaeva.
