Torǵai aýylynda rólge mas kúiinde otyrǵan mektep direktory oqýshy qyzdy qaǵyp ketti, - dep habarlaidy Sputnik Qazaqstan.
Oqiǵa 20 jeltoqsan kúni keshki saǵat 18:40-tyń kezinde Jangeldin aýdanynda bolǵan.
Máýlenov pen Quljanov kósheleriniń qiylysynda Volkswagen Polo markaly kóliktiń 62 jastaǵy júrgizýshisi 14 jastaǵy qyzdy qaǵyp ketken. Rólde aýyl mektebiniń direktory otyrǵan.
"Meditsinalyq tekseris kezinde kólik júrgizýshisi jeńil dárejede mas bolǵan. Tergeý sharalary júrgizilip jatyr. Saraptamalar taǵaiyndaldy. Sonyń negizinde protsessýaldyq sheshim shyǵarylady", - deidi politseiler.
Densaýlyq saqtaý basqarmasy usynǵan aqparatqa sáikes, kólik astyna túsken qyz birden Jangeldin aýdandyq aýrýhanasyna jetkizildi. Kólik ony oń jaq jambasynan soqqan. Oqýshy qatty qorqyp qaldy. Tekseristen keiin úiine jiberildi. Jaraqat almaǵan.
Al Qostanai oblystyq bilim berý basqarmasy direktordyń densaýlyq jaǵdaiyna bailanysty demalys alǵanyn habarlady.
"Jumysqa shyqqannan keiin onyń máselesi pedagogikalyq etika jónindegi keńestiń otyrysynda qaralady", - deidi mamandar.
Quqyq qorǵaý organdary talap etse, tergeý kezinde mektep direktoryn qyzmetten shettetýi múmkin.
