Ákimdikter ambýlatoriialyq-emhanalyq uiymdarda meditsinalyq kómektiń qoljetimdiligin arttyrý boiynsha is-sharalar qabyldaýy qajet.
Bul týraly QR Densaýlyq saqtaý birinshi vitse-ministri Marat Shoranov aitty, dep habarlaidy QazAqparat.
Ministrliktiń keńeitilgen alqa otyrysynda Marat Shoranov meditsinalyq-sanitarlyq alǵashqy kómek kórsetetin densaýlyq saqtaý uiymdaryna barǵandar sany bir turǵynǵa shaqqanda 4,9 quraǵanyn atap ótti. Jospar – 4,33 bolǵan. Iaǵni, qajetti kórsetkishke qol jetkizildi. Alaida, 5 óńir atap aitqanda, Atyraý, Soltústik Qazaqstan, Aqmola, Batys Qazaqstan, Mańǵystaý oblystary nysanaly mánge jetpedi.
«Óńirlerde ákimdikter ambýlatoriialyq-emhanalyq uiymdarda meditsinalyq kómektiń qoljetimdiligin arttyrý boiynsha is-sharalar qabyldaýy qajet»,-dedi birinshi vitse-ministr.
Onyń dereginshe, densaýlyq saqtaýdaǵy jeke investitsiialardyń úlesi 40,3 paiyzdy qurady. Meditsina uiymdarynyń meditsinalyq tehnikamen jaraqtandyrylýy 77 paiyz bolsa, meditsina uiymdary ǵimarattarynyń tozý deńgeii 58,2 paiyzǵa jetip otyr.
«Kemshilikter densaýlyq saqtaý nysandaryn kúrdeli jóndeýge, salýǵa jáne qaita qurýǵa buryn josparlanǵan qarajatty koronovirýs infektsiiasymen jáne onyń saldarymen kúresýge baǵyttaýmen bailanysty», - dep túsindirdi ol.
Birinshi vitse-ministrdiń aitýynsha, óńirlerde meditsinalyq kómektiń qoljetimdiligin arttyrý úshin aýyldyq eldi mekenderde 137 feldsherlik-akýsherlik, meditsinalyq pýnktter men dárigerlik ambýlatoriialar ashý josparlanǵan. 2021 jyly MJÁ aiasynda salynatyn 20 aýrýhananyń 8-i men Nur-Sultan jáne Almaty qalalarynda 2 iri meditsinalyq zertteý ortalyqtarynyń qurylysyn bastaý kózdelgen.
