Meditsina máselelerine qatysty suraqtardy qabyldaityn Qoldau-24/7 mobildi qosymshasy iske qosylǵan bolatyn. Osy ýaqyt ishinde turǵyndardan 598 ótinish kelip túsken. Onyń 19-y emdeý mekemeleriniń qyzmetine qatysty shaǵymdanǵan. Bul týraly «Áleýmettik meditsinalyq saqtandyrý qory» KEAQ Almaty qalalyq filialy direktory Tileýhan Ábildaev aitty, dep habarlaidy QazAqparat.
Onyń aitýynsha, qor atalǵan qosymshany azamattardyń mindetti áleýmettik meditsinalyq saqtandyrý máselelerine bailanysty suraqtaryn qabyldaý maqsatynda iske qosqan. Qazir Qoldau-24/7 qosymshasy tolyqqandy jumys istep tur.
«MSQ azamattardyń meditsinaǵa qatysty saýaldarynan habardar bolyp, olardy sheshýge septigin tigizetin bailanys kanaldaryn damytýǵa kúsh salyp jatyr. Keri bailanystyń bul túri qazir óte yńǵaily. Óitkeni, turǵyndardyń kóbi bailanys ortalyǵyna habarlasyp, týyndaǵan máseleni operatorǵa túsindirip jatqansha, elektrondy qosymshaǵa jazyp qaldyrǵandy durys kóredi. Turǵyndardyń ótinishteri arnaiy nómirmen tirkelip, máseleniń jaýaby belgilengen ýaqytta shaǵymdanýshynyń qosymshadaǵy akkaýntyna jiberiledi», – dedi filial basshysy.
Qosymshany uialy telefondaǵy App Store jáne Google play arqyly júkteýge bolady. Ótinish nemese shaǵym qaldyrý úshin mindetti túrde tirkelý qajet. Tirkelgen shaǵymdardy Qor mamandary óńdeidi, tiisti meditsina uiymdarymen birlesip sheshedi. Saraptama qajet bolǵan jaǵdaida monitoring júrgiziledi.
Sonymen qatar, qosymshada jii kezdesetin suraqtarǵa arnalǵan bólim bar. Azamattar kópshilikti mazalaityn saýaldardyń jaýabyn sol jerden taba alady.
Esterińizge sala ketsek, 2019 jyldyń qyrkúiek aiynda MSQ 1406 biryńǵai bailanys ortalyǵyn iske qosqan bolatyn. Ortalyq operatorlary MÁMS júiesine qatysty suraqtarǵa jaýap berip, meditsinalyq qyzmet sapasyna qatysty shaǵymdardy tirkeýmen ainalysady.
