Búgin Parlament Májilisiniń Áleýmettik-mádeni damý komitetiniń tóraǵasy qyzmetine depýtat Beibit Mamraev sailandy, dep habarlaidy "Ult aqparat".
«Komitet tóraǵasy laýazymyna Beibit Baimaǵambetuly Mamraevtyń kandidatýrasyn usynamyn. B. Baimaǵambetulyn jaqsy bilesizder, buǵan deiin kóptegen jaýapty qyzmetterdi abyroimen atqardy. Sońǵy birneshe jyl boiy Májilis depýtaty, sonyń ishinde osy Áleýmettik-mádeni damý komitetiniń hatshysy bolyp, mańyzdy zańdardy qabyldaýǵa óz úlesin qosyp keledi. Osy salada bilimi de, tájiribesi de mol. Sondyqtan atalǵan komitetti basqarý úshin Beibit Baimaǵambetuly laiyqty dep esepteimin», - dedi Májilis tóraǵasy Nurlan Nyǵmatýlin.
Eske sala keteiik, buǵan deiin atalǵan komitettiń tóraǵasy qyzmetin Gúlshara Naýshaqyzy Ábdiqalyqova atqarǵan bolatyn.
Jaqynda QR Prezidenti Qasym-Jomart Toqaevtyń Jarlyǵymen Gúlshara Naýshaqyzy Ábdiqalyqova Qyzylorda oblysynyń ákimi bolyp taǵaiyndaldy.
