Búgin Parlament Májilisiniń jalpy otyrysynda bir top depýtat jaiylymdyq jerlerdiń máselesi boiynsha Premer-Ministrdiń orynbasary Roman Skliardyń atyna saýal joldady, dep habarlaidy QazAqparat.
«Bizdiń depýtattyq saýalymyzǵa sailaýshylardan jer máselesi týraly, sonyń ishinde jaiylym jerlerge qatysty kóptegen aryz-shaǵymdardyń kelgendigi negiz bolyp otyr. Barshańyzǵa belgili, 2017 jyly jaiylymdyq jerlerdiń jetispeýshiligi problemasyn sheshý úshin «Jaiylymdar týraly» Zańy qabyldandy. Zań jaiylymdyq alqaptardy tiimdi retteýdi damytýǵa, onyń ishinde jaiylymdardy utymdy paidalanýǵa jáne olardyń infraqurylymyn jaqsartýǵa, jerdiń tozý protsesterin bolǵyzbaýǵa baǵyttalǵan. Zańnyń 13-15 baptaryna jáne Jer kodeksiniń 84-babyna sáikes qabyldanǵan normalarda jaiylym jerlerdiń tiimdi qoldanylýy jóninde kórsetilgen ári mal ósirýmen ainalysatyn úi sharýashylyqtarynyń qajettilikterin qanaǵattandyrýǵa baǵyttalǵan», - dep toqtaldy Fahriddin Qarataev.
Onyń paiymynsha, jergilikti atqarýshy organdar ol Zańǵa jetkilikti túrde mán bermei keledi. Zańnyń 13-babyna sáikes qabyldanǵan normativtik quqyqtyq aktiler - jaiylymdardy basqarý jáne olardy paidalaný jónindegi josparlar óńirlerde praktikada túrinde oryndalmaidy. Sonyń saldarynan aýyl turǵyndary arasynda áli kúnge deiin túsinispeýshilik pen narazylyqtar týyndap, jer máselesi boiynsha daýlar kóbeiip otyr.
«Nur Otan» partiiasynyń Partiialyq baqylaý komitetiniń komissiiasy atalǵan máseleni qarastyryp, tiisti memlekttik organdarǵa jaiylym jerlerge qatysty naqty usynystar bergen bolatyn. Olda búgingi tańǵa daiin sheshimin tappai otyr. Atalǵan komissiianyń málimetine súiensek, eldi mekender úshin jaiylymdyq jerlerdiń tapshylyǵy barlyq oblystar boiynsha baiqalady, - dedi depýtat.
Osy oraida ol jaiylymdardy paidalaný tiimdiligin arttyrý maqsatynda:
1. Oblystyq, qalalyq, aýdandyq, aýyldyq okrýgter, kentter, aýyldyq ákimdikterine biyldyń aiaǵyna deiingi merzimde «Jaiylymdar týraly» QR Zańynyń talaptaryn, onyń ishinde «Jaiylymdardy basqarý jónindegi josparlardy» jasaýdy, bekitýdi jáne praktikalyq qoldaný bóliginde oryndaý sharalaryn qabyldaý;
2. Memleket basshysy Q. Toqaevtyń biylǵy keńeitilgen Úkimet otyrysynda bergen tapsyrmasyna sáikes, jergilikti atqarýshy organdar eldi mekenderge qoldanylmai jatqan jaiylym jer ýchaskelerin memlekettik menshikke qaitarý jóninde qatań sharalar qabyldaý, sondai-aq, árbir eldi meken boiynsha jaiylymdardy basqarý jóninde naqty josparlar qurýdy ári osy jaiynda halyqty ashyq túrde habardar etý;
3. Zań sáikestigine orai ortalyq jáne jergilikti atqarýshy organdarmen qabyldanǵan barlyq zańdyq aktilerge saraptama júrgizý;
4. «Jaiylymdar týraly» Zańnyń 13, 15 - baptaryn jáne Jer kodeksiniń 84-baby 2-tarmaǵynyń 4-1) tarmaqshasynyń oryndalýyn erekshe baqylaýǵa alyp, Aýyl sharýashylyǵy ministrligi, óńirlerdegi jergilikti atqarýshy organdar jáne jer inspektsiiasymen birlesip, Zańdaǵy bekitilgen mindetterdi der kezinde oryndaý usynyldy.
