Búgin Parlament Májilisiniń jalpy otyrysynda depýtat Fahriddin Qarataev Túrkistan oblysyndaǵy balabaqshalardyń máselesin kóterdi. Osy oraida Premer-Ministrdiń orynbasary Eraly Toǵjanovtyń atyna saýal joldandy, dep habarlaidy QazAqparat.
«Bizdiń depýtattyq saýalymyz «NurOtan» partiiasynyń mektepke deiingi bilim mekemelerimen qamtamasyz etý jónindegi mindettemelerin iske asyrýǵa baǵyttalǵan. Bul máseleni Parlament depýtattary birneshe ret kótergen bolatyn, «NurOtan» partiiasynyń músheleri jaqynda sailaýshylarmen ótken kezdesý barysynda bul másele qaitadan kóterildi. Búgingi tańda, Túrkistan oblysyndaǵy jekemenshik balabaqshalary aianyshty jaǵdaida tur.
Ózińizge belgili, Túrkistan oblysynda búgingi tańda jekemenshik balabaqshalardaǵy jan basyna qarjylandyrý máselesi respýblika boiynsha eń tómengi mólsherde, iaǵni 25 582 teńgeni quraidy. Bul kórsetkish Qazaqstan Respýblikasynyń Bilim jáne ǵylym ministri 2017 jylǵy 27 qarashadaǵy buiryǵymen bekitilgen jan basyna qarjylandyrý ádistemesine sáikes aýyldyq jerde - 41 053 teńgeni, qalalyq jerde - 37 527 teńgeni quraýy tiis», - dedi Qarataev.
Onyń aitýynsha, Túrkistan oblysy boiynsha búgingi tańda 1024 jekemenshik balabaqsha jumys isteidi, iaǵni oblys boiynsha 72 paiyzdy qamtidy, osy balabaqshalarda – 115 myńnan astam (74%) bala tárbielenýde. 50 myń bala az qamtylǵan, 25 100 bala kóp balaly otbasynan keledi. Jekemenshik balabaqshalarda 36 840 adam turǵylyqty jumyspen qamtylǵan, onyń 19 myńnan asatamy pedagog qyzmetkerleri men tárbieshileri. Balabaqsha qyzmetkerleriniń ailyq jalaqysy 42 500 - 70 000 teńge aralyǵynda. Qyzmetkerlerdiń 50% - dan astamy kópbalaly jáne az qamtylǵan otbasylar, 10 000- nan astam adam eń tómengi ailyq jalaqyǵa jumys isteýde.
«Osyǵan orai, Túrkistan oblysy boiynsha, jergilikti biýdjetten qarjy tapshylyǵyna bailanysty, sońǵy 3 jyldaǵy infliatsiiany, pedagog kadrlardyń ailyq jalaqysynyń ósýine qaramastan, jan basyna qarjylandyrýdyń mólsherine qosymsha qarjy qarastyrylmaǵan. Osynyń saldarynan búgingi tańda oblys boiynsha 23,5 mlrd teńge qarjy tapshylyǵy týyndap otyr. Jergilikti atqarýshy organdar bul qarjyny jergilikti biýdjetten tóleý múlde múmkindigi joq ekendigin jetkizýde. Bul máseleni jekemenshik balabaqshalary basshylary 3 jyldan beri kóterip, barlyq atqarýshy memlekettik organdarǵa hat joldaǵan bolatyn, alaida osy kúnge deiin máseleniń sheshimi tabylmady. Jan basyna qarjylandyrý memlekettik bilim tapsyrmasyn oryndaý úshin Túrkistan oblysy boiynsha 23,5 mlrd tenge tapsyrys berilgen. Biraq respýblikalyq biýdjettik komissiianyń 2021 jylǵy 20 sáýirdegi №9 sheshimimen bul shyǵystar qoldaý tappady. Eger bul másele biyl da sheshimin tappasa, kásipkerler qyrkúiek aiynda jappai jumystaryn amalsyz toqtatatynyn bildirýde. Ol kezde taǵy da 100 myń bala balabaqshasyz, 20 myń adam jumyssyz qalý yqtimaly bar», - dedi depýtat.
«Osyǵan bailanysty, qandai sheshimder qabyldanady jáne tiisti qarjylandyrý qalai júzege asyrylatynyn túsindirýdi suraimyz», - dedi Fahriddin Qarataev.
