Májilistiń jalpy otyrysynda depýtat Jambyl Ahmetbekov múgedektigi bar jandardyń zeinetke shyǵý jasyn tómendetý máselesin kóterdi, dep habarlaidy QazAqparat.
«Jyldar boiy Qazaqstan Halyq partiiasynyń depýtattary múgedektigi bar adamdardyń problemalyq máselelerin kóterip, olardy sheshý boiynsha jumys júrgizip keledi. Ótken jyldyń sáýir aiynda biz múgedektigi bar adamdar úshin zeinet jasyn tómendetý týraly másele kóterdik. Múgedektigi bar qazaqstandyqtardyń eńbek etýge quqyǵy bar jáne olardyń keibireýleri zeinet jasyna jetkennen keiin jumysyn jalǵastyrǵysy keledi. Degenmen mundai adamdar az. Zeinetke shyǵý qarsańyndaǵy múgedektigi bar adamdarǵa jumys isteý densaýlyǵyna bailanysty fizikalyq qiyndyq týǵyzady. Burynǵy Úkimet múgedektigi bar adamdardyń zeinet jasy tómendegen kezde taǵaiyndalǵan yntymaqty zeinetaqy mólsheri múgedektik boiynsha ai saiynǵy járdemaqydan tómen bolady dep jaýap berdi. Nelikten zeinetaqy júiesin múgedektigi bar adamdar úshin erekshe jaǵdai jasaýǵa ózgertpeske?», - dedi J. Ahmetbekov Úkimet basshysy Álihan Smaiylovtyń atyna joldaǵan saýalynda.
Onyń paiymynsha, múgedektigi bar zeinetkerler mindetti túrde zeinetaqyny da, múgedektigi boiynsha járdemaqyny da alýy tiis.
«Bizdiń elde quqyq qorǵaý jáne arnaiy organdardyń qyzmetkerleri ǵana zeinetke erte shyǵady. Múgedektigi bar qazaqstandyqtardy zeinetaqymen qamtamasyz etýde osyndai tásil qoldanylýǵa tiis dep esepteimiz. Biz azamattardyń ómir súrý sapasyn jaqsartý úshin qabyldanýǵa tiis sharalar men sheshimder týraly aitqanda Úkimet ádettegidei: «Bul – biýdjetke qosymsha aýyrtpalyq ákeledi» dep jaýap beredi. Bul tásilge qarsy birneshe obektivti dálel bar. Birinshiden, Qazaqstanda jumys isteitin zeinet jasyndaǵy múgedekterdiń sany 3 myń adamnan az. Jumys isteitin 50 myń múgedektiń ortasha jasy 45 pen zeinet jasy aralyǵyn qurady. Iaǵni olardyń sany kóp emes», - dedi depýtat.
Joǵaryda aitylǵandardy eskere otyryp jáne el Prezidentiniń bastamalaryn qoldaý maqsatynda Qazaqstan Halyq partiiasy fraktsiiasynyń depýtattary:
1. Múgedektigi bar adamdar úshin zeinetaqy jasyn tómendetýdi;
2. Múgedek adamdar uiymdarynyń mindetti túrde qatysýymen múgedek adamdardyń zeinetke shyǵý jasyn tómendetýdiń jáne aiqyndaýdyń naqty ólshemderin (múgedektik tobyn, densaýlyq jaǵdaiyn, aýrýyn, eńbek sipatyn jáne t.b. eskere otyryp), sondai-aq múgedek adamdardyń múddesine sai keletin zeinetaqymen qamsyzdandyrý tetigin ázirleýdi;
3. Múgedekter problemasyn, onyń ishinde jumys isteitin múgedekter jasynyń eńbekke qabilettiligine áseri týraly qajetti ǵylymi zertteý josparyn daiarlaýdy;
4. «Múgedek adamdardyń quqyqtaryn qamtamasyz etý jáne ómir súrý sapasyn jaqsartý jónindegi 2025 jylǵa deiingi ulttyq josparǵa» múgedek adamdardy zeinetaqymen qamsyzdandyrý, statistikalyq derekterdi jinaý jáne múgedektik máselelerin ǵylymi zertteý, múgedektik salasyndaǵy jumysy tiimdiliginiń indikatorlaryn ázirleý bóliginde pysyqtaý engizýdi;
5. Ázirlenip jatqan áleýmettik Kodekske múgedektigi bar adamdardyń zeinet jasyn tómendetý máselesin engizýdi usynady.
