Májilistiń jalpy otyrysynda depýtat Berik Dúisenbinov kúrish salasymen ainalysatyn diqandardyń máselelerin kóterdi, dep habarlaidy QazAqparat.
«Osy jyldyń naýryz aiynda «Aq jol» fraktsiiasynyń depýtattary Qazaqstan Respýblikasynyń Ekologiia, geologiia jáne tabiǵi resýrstar ministriniń atyna sý tapshylyǵyna bailanysty elimizdegi kúrish alqaptaryn 29 myń gektarǵa azaitý týraly málimdemesine túsindirme berýin surap saýal joldaǵan bolatyn. Ministrdiń bergen mardymsyz jaýabyna jáne jaqynda Aqjol partiiasyna kelip túsken Almaty oblysynyń Balqash, Eskeldi aýdanynyń kúrishshi diqandarynyń hattaryna orai búgin qaita saýal joldaýǵa májbúrmiz. Bir ǵasyrǵa jýyq tarihy bar, aǵa býynnyń mańdai terimen sýarylǵan, ashtyq pen soǵys jyldarynda elge talǵajaý bolǵan, keshegi daǵdarys ýaqytynda aýyldardyń tiregi bolǵan «aq altynymyz», búginde qazaq eliniń «Aq marjan» brendine ainalǵan. Kúrish egetin úsh oblysty qosqanda bir millionǵa jýyq azamatqa jumys berip otyrǵan kúrish salasynyń eshqandai ǵylymi zertteýsiz, bir paraqqa siiatyn buiryqpen sizder qalai úshten bir bóligin qysqartpaqsyzdar?! Kúrish alqaby, joǵaryda aitylǵandai, qysqarsa, orta eseppen úsh júz myńǵa tarta adam jumyssyz qalmaqshy, olardyń januiasyn qalai asyraisyzdar?! Álde, olar da áleýmettik kómektiń kezegine tura ma ?!», - dedi B. Dúisenbinov QR Premer-Ministriniń orynbasary Roman Skliardyń atyna joldaǵan saýalynda.
Onyń aitýynsha, azyq-túliktiń qymbattaýy, pandemiia, ekonomikalyq daǵdarystar kezinde elimizdegi árbir kásiporynnyń, jumys ornynyń, ásirese, aýyldaǵy kúnkóristiń mańyzy óte zor. Tipten jańa jumys ornyn ashý úshin memleketimiz milliardtaǵan qarjy jumsaýda.
«Olai bolsa, ǵasyrlyq tarihy bar, áleýmettik, ekonomikalyq quny baǵa jetpes sala týraly tereń oilanyp, elmen, mamandarmen aqyldasyp baryp, salmaqty ári ashyq sheshim nege qabyldamaisyzdar?! Almaty oblysynyń kúrishshilerinen kelgen hatqa súiensek, olar kúrishti tek tabys tabý úshin ǵana emes, týǵan jerleriniń shólge, tuzǵa ainalmaýy úshin ekologiialyq maqsatta egip otyr. Elimizdiń ekologiiasyna jaýapty memlekettik organ bul máselemen tanys dep oilaimyz. Biyl qatty qýańshylyq bolyp, Syr elinde, Túrkistan men Almaty oblysynyń shóleit aýdandarynda malǵa jem-shóp bolyp otyrǵan da kúrishtiń arqasynda sý ishken kúrmek shóp pen kúrishtiń sabany, iaǵni, kúrish egilmese, mal da azyqsyz qalatyn edi. Bizdiń quzyretti memlekettik organdar sýdyń tapshylyǵyn tek qana egistik alqapty qysqartýdan ǵana emes, Ile men Dariianyń, Jaiyq pen Ertistiń basynda otyrǵan kórshilerimizden jáne sýdy únemdi paidalanýdyń zamanaýi tehnologisyn qoldanýdan izdeý kerek», - dedi depýtat.
Joǵaryda baiandalǵandardy eskere otyryp, «Aqjol» fraktsiiasy tiisti saýaldardy joldady.
«Bolashaqta elimizdiń ekonomikasynda kúrish salasy bola ma, joq pa? Eger kúrish óndirisi saqtalyp, sý kanaldaryn, injenerlik drenajdy júieni qalpyna keltirý jumystary bastalsa, osy júieni bolashaqta ózderi paidalanatyn diqandardyń ózin jumysqa tartýdy josparlap otyrsyzdar ma? Al endi kúrish alqaptary qysqartylsa, jumyssyz qalǵan joǵarǵy deńgeili mamandardy basqa salaǵa, basqa kásippen ainalysýǵa, mysaly, mal sharýashylyǵyna beiimdeý qarastyrylǵan ba? Olai bolsa, qysqy merzimdi paidalanyp, olardy qaita oqytyp, kóktemge qarai jańa daqyl tuqymymen nemese analyq mal basymen qamtý múmkindigi bola ma? Eger joǵaryda aitylǵan máseleler sheshilmese, sarapshylardyń paiymdaýynsha, úsh júz myńǵa jýyq azamattarymyz jumyssyz qalý qaýpi bar. Bul azamattarymyzdyń kópshiligi qalaǵa keleri sózsiz, aýyl otasylary kópbalaly, olardy mekteppen, baspanamen, jumyspen qamtýǵa daiynsyzdar ma?», - dedi Berik Dúisenbinov.
