QR Parlamenti Májilisinde «QR Úkimeti men Birikken Arab Ámirlikteri úkimetiniń basym salalardaǵy jobalardy damytý úshin uzaqmerzimdi strategiialyq áriptestik qurý týraly birlesken deklaratsiiasyn ratifikatsiialaý týraly» zań jobasy tanystyryldy, dep habarlaidy QazAqparat.
Qujat jobasyn QR Ulttyq ekonomika vitse-ministri Álisher Ábdiqadyrov tanystyrdy.
Zań jobasyndaǵy shetel investitsiiasy tartylatyn basym baǵyttar retinde energetika, kólik-logistika, qarjy, aýyl sharýashylyǵy jáne farmatsevtika salalary tańdap alynǵan.
«Úkimettiń basty mindetteriniń biri elgen investitsiia tartý ekenin bilesizder. Deklaratsiia bizge Birikken Arab Ámirlikteriniń iri kompaniialarynan 6 mlrd dollardan astam tikelei sheteldik investitsiia tartýǵa múmkindik beredi. Negizinen energetikalyq infraqurylym salýǵa tartylady. BAÁ tarapynan «Abý-Dabi» egemendi qory - ADQ, sondai-aq, aktivteriniń jiyntyq somasy 215 mlrd dollardan asatyn TAQA ulttyq energetikalyq kompaniiasy áriptes bolady. Bul kompaniianyń álemdegi 11-den astam elde investitsiialyq jáne basqarý tájiribesi bar», - dep bastady sózin vitse-ministr.
Aitýynsha, osy deklaratsiia aiasynda Qazaqstannyń energetika júiesin kómirtegi beitaraptyǵyna beiimdeitin birlesken kontsortsiým qurylmaq.
«Deklaratsiianyń negizgi mindetiniń biri – ADQ arab qorynyń úlesi 51 paiyz bolatyn, «Samuryq-Qazynanyń» úlesi 49 paiyz bolatyn birlesken energetikalyq kontsortsiým qurý. Holdingtiń maqsaty Qazaqstannyń elektr energetikasy infraqurylymyn jańǵyrtyp, jańa nysandar salý bolmaq. Árine, holding jumysynyń nátijesi eldiń energetika óndirisindegi jańǵyrtylatyn enegriianyń úlesin qazirgi 3 paiyzdan 2025 jylǵa qarai 6 paiyzǵa deiin arttyrý bolady. Sondai-aq, qoldanystaǵy elektr stansalaryn jańǵyrtý arqyly aýaǵa tastalatyn ziiandy zattardyń úlesin azaitý kózdelgen. Deklaratsiiany iske asyrý 2060 jylǵa qarai kómirtegi beitaraptyǵyna qol jetkizý mindetin iske asryýǵa eleýli úles qosady», - dedi Álisher Ábdiqadyrov.
Onyń málimeti boiynsha deklratsiia aiasynda Qazaqstan tarapyna mynadai mindettemeler júktelmek:
- Jańartylatyn energiia kózderi boiynsha offteik-kelisimsharttar bekitý;
- Qajetti injenerlik infraqurylym tóseý;
- Jobalardy júzege asyrý úshin jalǵa jer telimderin usyný;
- Energetika, qurylys salalarynda halyqaralyq retteý standarttaryn engizý;
Al BAÁ tarapynyń mindetteri:
- Strategiialyq jobalarǵa jeńildik sharttarymen investitsiia tartý;
- Ekonomikanyń negizgi salalarynda jetekshi halyqaralyq tehnologiialardy tartyp, iske qosý;
«Deklaratsiia myna salalar boiynsha da jobalardy iske asyrýdy kózdeidi:
Birinshi – 50 mln dollarǵa usaq mal ósiretin ferma qurý. Sonyń negizinde jyl saiyn 8 myń tonna qoi etin óndirý qajet. Óndirilgen ettiń negizgi bóligi BAÁ- ge eksporttaý josparlanǵan.
Ekinshi – 24 kóterme-taratý ortalyǵynyń jelisin damytýǵa 28 mln dollar investitsiia tartý, ADQ jáne «Qazyna Kapital Menedjment» arasynda kapital mólsheri 100 mln dollar bolatyn venchýrlyq qor qurý. Sondai-aq, farmatsevtika salasyndaǵy yntymaqtastyq ornatýǵa bolady», - dedi Ulttyq ekonomika ministriniń orynbasary.
Zań jobasynyń tanystyrylymyna Májilis depýtattarymen birge «Atameken» ulttyq kásipkerler palatasynyń ókilderi, múddeli ministrlikterdiń basshylary, qoǵamdyq uiymdar men parlamenttik emes saiasi partiia músheleri qatysty.
Májilis ókilderi zań jobasynda eki taraptyń mindeti men quqyǵy týraly málimetter naqtylanbaǵanyn, qarjylyq esepter tolyq saraptalmaǵanyn alǵa tartyp, qujatty qaita pysyqtap usynýdy surady.
Talqylaý barysynda tolyqqandy jaýap berilmegen máseleler boiynsha naqty jaýap bolǵan kezde ǵana deklaratsiiany ratifikatsiialaý máselesi qaralady.
