Ádilet ministrligindegi vedomstvoaralyq komissiia otyrysynda «QR keibir zańnamalyq aktilerine ǵylym máseleleri boiynsha ózgerister men tolyqtyrýlar engizý týraly» zań jobasy qaraldy, dep habarlaidy QazAqparat.
«Bul zań jobasy Memleket basshysynyń ǵylymdy qarjylandyrýdyń ashyqtyǵyn qamtamasyz etý jáne ǵylymi zertteýlerdiń sapasyn arttyrý tapsyrmasyn oryndaý maqsatynda ázirlengen. Iaǵni bul qujattyń basty maqsaty – ǵylym boiynsha granttyq, baǵdarlamalyq jáne maqsatty qarjylandyrýdyń ashyqtyǵyn qamtamasyz etý, jemqorlyqqa itermeleýi múmkin normalardy alyp tastaý. Bizde ǵylymi-tehnikalyq jumystyń nátijesin kommertsiialaýdyń qarjylandyrý mehanizmi zańnamalyq turǵyda tolyqqandy jazylmaǵan. Bul kemshilikterdi osy zań jobasy arqyly retteý kózdelip otyr. Iaǵni granttyq qarjylandyrýdyń mehanizmi tolyǵymen jazylady», - dedi Parlament Májilisiniń depýtaty Jámilá Nurmanbetova vedomstvoaralyq komissiia otyrysynan keiin tilshilerge.
Májilismenniń aitýynsha, zań jobasy arqyly ulttyq ǵylymi keńestiń sapaly quramyn jasaqtaý da josparda bar.
«Jalpy konkýrstar ádiletsiz ótti degen syńaidaǵy ǵalymdardyń shaǵymy buǵan deiin aitylyp kele jatyr. Sol sebepti ashyqtyqty qamtamasyz etý úshin ulttyq ǵylymi keńestiń sheshimderi ashyq daýys berý jolymen ári bekitilgen biýdjet aiasynda ótkenin qalaimyz. Sonymen qatar zań jobasy konkýrstardy jariialaý, oǵan qatysý týraly ótinimder jáne konkýrs sheshimine deiingi protsestiń tolyq barysyn ashyq aqparat kózderinde jariialaýdy kózdeidi. Iaǵni bul konkýrsty jariialaǵan ministrliktiń saitynda bul málimettiń bári de ashyq bolýy tiis», - deidi ol.
Jámilá Nurmanbetova óz sózinde kez kelgen adam Bilim jáne ǵylym ministrliginiń saityna kirip, kimniń konkýrsqa qatysqanyn, kimniń jeńimpaz atanǵanyn bilip otyrýy kerektigin aityp ótti.
Bilim jáne ǵylym ministrligi Májilis depýtattary usynǵan 42 normanyń 29-yn qoldaǵan. 11 normany qoldamaǵanymen, aldaǵy otyrystarda zań jobasy keńinen talqylanbaq.
