Parlament Májilisi «Qazaqstan Respýblikasynyń keibir zańnamalyq aktilerine jer qatynastary máseleleri boiynsha ózgerister men tolyqtyrý engizý týraly» zań jobasyn talqylaidy, dep habarlaidy QazAqparat.
«Zań jobasy Qazaqstan Prezidenti Qasym-Jomart Toqaevtyń zań shyǵarý bastamasy tártibimen engizildi. Zań jobasyn qabyldaýdyń maqsaty – sheteldikterdiń, azamattyǵy joq adamdardyń, sheteldik zańdy tulǵalardyń, sheteldik qatysýy bar Qazaqstan Respýblikasy zańdy tulǵalarynyń, halyqaralyq uiymdardyń, sondai-aq halyqaralyq qatysýy bar ǵylymi ortalyqtardyń aýyl sharýashylyǵy maqsatyndaǵy jer ýchaskelerin jekemenshik quqyǵymen jáne ýaqytsha jer paidalaný quqyǵymen ie bolýyna tyiym salýdy engizý», - dedi Májilistiń Agrarlyq máseleler komitetiniń tóraǵasy Erlan Barlybaev palatanyń jalpy otyrysynda.
Osy oraida depýtat Agrarlyq máseleler komiteti atalǵan zań jobasy boiynsha qorytyndy ázirleýge daiyn ekenin atap ótti.
Eske sala keteiik, jaqynda Prezident Qasym-Jomart Toqaev jerdi sheteldikterge satýǵa birjola tyiym salýdy kózdeitin zań jobasyn Májiliske joldaǵanyn aitqan edi.
«Búgin men ózimniń Prezident retinde zań shyǵarýǵa bastamashylyq etý quqyǵymdy paidalanyp, jerdi sheteldikterge satýǵa jáne jalǵa berýge birjola tyiym salýdy kózdeitin zań jobasyn Májiliske joldadym. Parlament ony belgilengen reglamentke sáikes qarastyryp, tiisti sheshim qabyldaidy», - dep jazdy Memleket basshysy Twitter-de.
