Parlament Májilisiniń jalpy otyrysynda «Tunshyqtyratyn, ýly nemese basqa da uqsas gazdar men bakteriologiialyq quraldardy soǵysta qoldanýǵa tyiym salý týraly hattamany (Jeneva, 1925 jylǵy maýsym) ratifikatsiialaý týraly» zań jobasy maquldandy, dep habarlaidy "Ult aqparat".
«Elbasy Nursultan Nazarbaev jappai qyryp-joiý qarýyn paidalanbaý, barlyq biologiialyq zertteýlerdi tek beibit maqsatta paidalaný, halyqaralyq qaýipsizdikti nyǵaitý boiynsha óz ustanymyn álemdik deńgeide kóterip, naqty istermen dáleldedi. Qazaqstan bakteriologiialyq jáne ýytty qarýdy ázirleýge, óndirýge ári olardyń qoryn jinaqtaýǵa tyiym salý jáne olardy joiý týraly konventsiiany buryn ratifikatsiialaǵan. Ýákiletti organ retinde 2007 jyly Bilim jáne ǵylym ministrligi bolǵan edi. Osy qabyldanǵan konventsiiany tolyqtyratyn jáne nyǵaitýshy elementter retinde sanalatyn Jeneva hattamasy bolyp otyr. Bul eki halyqaralyq qujat bir-birimen óte tyǵyz bailanysty. Usynylyp otyrǵan Jeneva hattamasy halyqaralyq qaýipsizdik júiesinde mańyzdy ról atqarady ári osy saladaǵy qajetti tetikterdiń biri bolyp sanalady. Atalmysh hattama 20 ǵasyrdyń basynda qabyldansa da, búginge deiin ol osy himiialyq tunshyqtyratyn, ýly bakteriologiialyq quraldardy qoldanýǵa tyiym salatyn basty zańdy qujattyń biri bolyp tanyldy. Sondyqtan ministrlik Jeneva hattamasyn ratifikatsiialaý máselesin nazarǵa usynyp otyr», - dedi A. Aimaǵambetov.
Osy oraida ol atalǵan qujat elimizdiń syrtqy saiasatynyń tujyrymdamasyna sáikes keletinin atap ótti.
«Prezident Ákimshiliginiń jáne Qaýipsizdik Keńesiniń tapsyrmasy boiynsha Jeneva hattamasyn ratifikatsiialaý máselesi bizdiń ministrlikke júktelgen bolatyn. Qujattyń ǵylymi-quqyqtyq saraptamasyn ál-Farabi atyndaǵy Qazaq ulttyq ýniversiteti júrgizdi. Osy saraptamaǵa sáikes, Jeneva hattamasy Qazaqstannyń syrtqy saiasatynyń tujyrymdamasyna, sondai-aq elimizdiń halyqaralyq sharttar týraly zańǵa tolyq kólemde sáikes keledi», - dedi Ashat Aimaǵambetov.
