Májilistiń jalpy otyrysynda «Qazaqstan Respýblikasynyń sot júiesi men sýdialarynyń mártebesi týraly» Qazaqstan Respýblikasynyń Konstitýtsiialyq zańyna ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy QazAqparat.
Zań jobasyn QR Parlamentiniń depýtattary Qazaqstan Respýblikasy Prezidenti janyndaǵy Sot jáne quqyq qorǵaý júielerin reformalaý jónindegi komissiia ázirlegen sot júiesin jetildirý jónindegi tásilderdi iske asyrý maqsatynda ázirledi.
Osylaisha, zań jobasynda sýdialar korpýsynyń kásibiligin arttyrýǵa, sondai-aq sýdialardyń jaýapkershiligi men táýelsizdigin arttyrýǵa baǵyttalǵan túzetýlerdiń eki blogy kózdelip otyr.
Májilistiń Zańnama jáne sot-quqyqtyq reforma komitetiniń málimetinshe, zań jobasynda sýdia kadrlardy irikteý jáne sýdialardyń kásibi qyzmetin baǵalaý tetikterin jetildirýge, sýdialardy jaýapqa tartýdyń eskirgen merzimderin ulǵaitýǵa, sondai-aq sottardy qarjylandyrýdyń jańa modelin belgileýge baǵyttalǵan ózgerister men tolyqtyrýlar engizý kózdelýde.
Sottardy qarjylandyrýdyń jańa modelin belgileý, sondai-aq sýdialardyń ózin-ózi basqarý organdarynyń qarajatty bólýi sot júiesiniń táýelsizdigin qamtamasyz etedi, sondai-aq sot tóreligin tolyq ári táýelsiz júzege asyrý múmkindigin jetkilikti dárejede qamtamasyz etýge múmkindik beredi.
Respýblika Konstitýtsiiasynda sottardy qarjylandyrý, sýdialardy turǵyn úimen qamtamasyz etý respýblikalyq biýdjet qarajaty esebinen júrgiziledi jáne ol sot tóreligin tolyq ári táýelsiz júzege asyrý múmkindigin qamtamasyz etýge tiis dep belgilengen.
Jumys toby aiasynda zań jobasyn talqylaý kezinde tártiptik is júrgizý aiasynda sýdianyń is-áreketin tekserý úshin oǵan qatysty materialdardy Sot jiýriine berý týraly máselelerdi oblystyq sottyń jalpy otyrysynyń talqylaýyna shyǵarý merzimderin naqtylaý boiynsha túzetýler qabyldandy.
«Qazaqstan Respýblikasynyń sot júiesi men sýdialarynyń mártebesi týraly» Konstitýtsiialyq zańnyń 30-babyna oblystyq sottyń sýdiasy qyzmetine úmitker, quqyqtyń jekelegen salalarynyń mamandary bolyp sanalatyn adamdardy konkýrstyq irikteýge qatysty naqtylaýshy túzetýler engizildi.
Sondai-aq aýdandyq sottarda teń dárejeli laýazymdarǵa kandidattardy irikteý kezinde shalǵaidaǵy jáne quramy az sottarda keminde bes jyl jumys istegen sýdianyń basymdyǵyna qatysty túzetýler engizildi.
Budan basqa, quqyqtyq olqylyqtardy bolǵyzbaý, zań jobasynyń normalaryn bir-birine jáne Qazaqstan Respýblikasynyń basqa da zańnamalyq aktilerine sáikes keltirý maqsatynda zań jobasynyń búkil mátini boiynsha zań tehnikasyna qatysty jáne redaktsiialyq, naqtylaýshy sipattaǵy túzetýler engizildi.
Parlament Májilisiniń turaqty komitetteri zań jobasy boiynsha oń qorytyndylaryn berdi.
Budan bólek, jalpy otyrysta «Qazaqstan Respýblikasynyń keibir zańnamalyq aktilerine sot júiesi máseleleri boiynsha ózgerister men tolyqtyrýlar engizý týraly» ilespe zań jobasy da ekinshi oqylymda maquldandy.
