QR Parlamenti Májilisiniń jalpy otyrysynda «Qazaqstan Respýblikasynyń keibir zańnamalyq aktilerine dene shynyqtyrý jáne sport máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy QazAqparat.
Zań jobasynyń negizgi maqsaty – qoldanystaǵy dene shynyqtyrý jáne sport salasyndaǵy zańnamany jetildirý, dopingke qarsy erejelerdi qatańdatý, Ulttyq dopingke qarsy ortalyqtyń mártebesin kóterý.
Zań jobasyn ekinshi oqylymǵa daiyndaý barysynda depýtattar zańnyń uǵymdyq apparatyn naqtylaýdy mazmundy túrde qozǵaityn túzetýler engizdi. Olar: «sportshyny jarystan shettetý», «jattyqtyrýshyny, jattyqtyrýshy-oqytýshyny, sport meditsinasy jónindegi mamandy, dene shynyqtyrý salasyndaǵy ózge de mamandy, sport tóreshisin qyzmetin atqarýdan shettetý. Qujat jumys protsesinde «sporttyq ádep», «birinshi jattyqtyrýshy», «jeke jattyqtyrýshy» degen uǵymdarmen tolyqtyryldy.
Sonymen qatar, dopingke qarsy qaǵidalardy buzǵany úshin jazalaý maqsatynda depýtattardyń túzetýlerimen sportshylardy, jattyqtyrýshylardy, dene shynyqtyrý men sport salasyndaǵy ózge de qatysy bar sýbektilerdi turǵynjaidan, sporttyq ataqtan, sporttyq razriadtan jáne biliktilik sanatynan aiyrýdyń quqyqtyq negizderi pysyqtalyp, naqtylandy.
Munymen qosa, zań jobasynyń jańashyldyǵymen chempiondarmen júldegerlerge jergilikti atqarýshy organnyń kommýnaldyq turǵyn úi qorynan jalǵa baspana berý, al 10 jyl ótken soń ony menshikke alý negizderi bekitiledi. Bul rette, álemdik birinshilik chempiondary men júldegerleri qaitys bolǵan jaǵdaida, osy turǵyn úidi menshikke alý úshin olardyń muragerleriniń múddelern eskerý usynyldy.
Eske sala keteiik, biyl naýryz aiynda Parlament Májilisi atalǵan zań jobasyn birinshi oqylymda maquldaǵan bolatyn.
